„Ова алармантно зголемување на употребата на смртната казна е резултат на мала, изолирана група држави кои се подготвени да извршуваат егзекуции по секоја цена, и покрај тековниот глобален тренд кон укинување на смртната казна“, изјави шефицата на Амнести интернешнл, Ањес Каламар, во соопштение објавено денес.
Каламар ги издвои Кина, Иран, Северна Кореја, Саудиска Арабија, Јемен, Кувајт, Сингапур и САД, велејќи дека „ова бесрамно малцинство ја користи смртната казна како оружје за всадување страв, задушување на несогласувањето и демонстрирање на стегите што државните институции ги имаат врз луѓето во неповолна положба и маргинализираните заедници“.
Амнести предупреди дека порастот, што организацијата го опиша како „зачудувачки“, е резултат на неколку влади кои се решени да владеат со страв. Иран особено се издвојуваше, каде што беа егзекутирани најмалку 2.159 лица, повеќе од двојно во однос на бројот во 2024 година.
Вкупниот број за 2025 година не ги вклучува илјадниците егзекуции за кои Амнести интернешнл верува дека продолжиле да се извршуваат во Кина, која остана „водечки светски џелат“.
Други земји што беа истакнати се Саудиска Арабија со најмалку 356 егзекуции, главно за злосторства поврзани со дрога, САД со 47 егзекуции и Египет со 23. Егзекуциите се зголемија за 78% во 2025 година откако беа регистрирани најмалку 1.518 егзекуции во 2024 година, соопшти Амнести интернешнл во својот извештај.
Пристапот на казнување во „војната против дрогата“ доведе до проширување на употребата на смртната казна, што се рефлектира во фактот дека 1.257, или 46% од сите познати егзекуции, се регистрирани за кривични дела поврзани со дрога.
Сепак, Амнести интернешнл, исто така, забележа напредок во обидите за укинување на смртната казна. Кога ја започна својата кампања против смртната казна во 1977 година, само 16 земји ја укинаа. „Денес, тој број се искачи на 113, или повеќе од половина од земјите во светот, додека повеќе од две третини воведуваат законско или практично укинување“, се наведува.
