Дебито помина, македонските фудбалери се поискусни за еден натпревар на Европските првенства, избраниците на селекторот Ангеловски почувствуваа како е да се игра на еден голем турнир, па тој терет веќе е тргнат од плеќите.
Денеска Македонија го игра вториот меч, противник ни е селекцијата на Украина која по сите параметри е фаворит во овој меч. Но тоа не ја намалува надежта кај македонската јавност, а таа се темели на фактот дека нашата репрезентација знаела да извади добар резултат и со многу посилни селекции од Украинците.
„Ние дојдовме на ова Европско првенство со цел да се бориме за пласман во следната фаза и таа цел сѐ уште стои пред нас, а нѐ чека меч со директен конкурент, кој како и ние има нула бодови и ова е своевидно финале. Победникот од овој меч ќе си ги зголеми шансите за пласман, а ние немаме притисок, зашто Украина е фаворит, а за нив ако не успеат да нѐ победат и да се пласираат понатаму тоа ќе биде трагедија“, вели селекторот Ангеловски.
Поразениот од овој дуел веројатно ќе ги загуби шансите за пласман во следната фаза иако теоретски може и со три бода да се избори место во нокаут рундата.
Заменик-капитенот, Стефан Ристовски е свесен дека овие натпревари се поинакви од квалификациските, на ЕП сите се мотивирани, подготвени и го даваат максимумот.
„На Европско играат сите најдобри, сите играат 90 минути, сите играат да победат, така и ние. Не дојдовме да бидеме туристи и Македонија има огромен квалитет, па ќе го покажеме тоа, да играме со два блока, со одлични контри и така можеме да дојдеме до три бода“, вели Ристовски.
Атмосферата во нашиот табор е позитивна, сите фудбалери се здрави и подготвени за игра. Не се очекуваат крупни промени на составот од страна на селекторот Ангеловски, евентуално може да се случи поместување на Стефан Ристовски на десната бековска позиција, а на негово место во централниот дел од одбраната да игра Бејтулаи или Кире Ристевски. При една таква промена жртва би бил Николов кој би се преселил на клупата.
Натпреварот меѓу Македонија и Украина почнува од 15 часот, а вториот дуел од нашата група, мечот меѓу Холандија и Австрија се игра вечерва од 21 часот.
