Барселона и Реал Мадрид вечерва ќе се борат за трофејот во Купот на Шпанија, а бразилскиот канал ТНТ Спортс ја искористи оваа прилика да седне на разговор со Рафиња.
Капитенот на „каталонците“ говореше на многу теми, а доби и прашање за понудата од Саудиска Арабија и сториите кои велеа дека напаѓачот добил предлог тежок 200 милиони евра, односно четиригодишна соработка со плата од 50 милиони евра по сезона.
„Вчера ме информираа за понудата од Саудиска Арабија, и искрено, бев многу изненаден бидејќи сумите беа луди. Да добиев ваква понуда минатото лето, сигурно ќе заминев. Тогаш се чувствував изгубено и ментално истрошено, а тоа се пари кои сигурно ќе го променат мојот живот и животот на моето семејство“ – вели Рафиња.
„Секој што ќе ви каже дека нема добро да размисли, едноставно ве лаже. Ваква сума на пари целосно ќе ви го промени животот па невозможно е да не размислите“.
Бразилецот потоа додаде: „Но сега не мислам на парите, тие ми се во втор план. Целиот фокус сега ми е на соништата“.
Рафиња има фантастична сезона во дресот на Барселона, и важи за еден од главните кандидати за престижната „Златна топка“.
