Градските птици како гулабите, врапчињата и страчките се плашат повеќе од жените отколку од мажите, но научниците сè уште не можат да објаснат зошто, пренесува Индипендент.
Во неодамна објавена студија, истражувачите откриле дека птиците можат да го препознаат полот на личноста и дека им дозволуваат на мажите да им се приближат во просек за еден метар поблиску пред да полетаат.
Наодите, кои беа конзистентни кај сите 37 проучувани видови птици, беа објавени во списанието на Британското еколошко друштво. Научниците сега се надеваат дека ќе откријат што ги прави жените „пострашни“ за птиците.
„Целосно верувам во нашите резултати, дека градските птици реагираат различно во зависност од полот на лицето што им се приближува, но во моментов не можам да објаснам зошто“, рече професорот Даниел Блумштајн, коавтор на студијата од Универзитетот во Калифорнија.
Студијата е спроведена во Чешка, Франција, Германија, Полска и Шпанија и вклучува 2.701 набљудувања.
Во студијата учествувале мажи и жени, со иста висина и облека, кои оделе во права линија кон птиците во градските паркови и зелените површини. Меѓу набљудуваните видови биле сипки, косови и клукајдрвци.
Во просек, жените можеле да се приближат на околу 8,5 метри пред птицата да одлета, додека мажите можеле да се приближат на околу 7,5 метри.
„Ова е можеби најинтересниот дел од нашето истражување“, рече д-р Федерико Морели од Универзитетот во Торино. „Го идентификувавме феноменот, но навистина не знаеме зошто се случува. Сепак, нашите резултати укажуваат на софистицирана способност на птиците да ја проценат својата околина.“
Научниците откриле дека градските птици можат да го препознаат полот на луѓето што им се приближуваат, но не е јасно врз основа на кои карактеристики.
Се претпоставува дека тие би можеле да детектираат феромони, облик на телото или одење, но потребни се понатамошни истражувања.
„Како жена во оваа област, бев изненадена што птиците реагираат различно на нас. Оваа студија покажува како животните во градовите ги „гледаат“ луѓето, што има импликации за урбаната екологија и еднаквоста во науката. Многу студии за однесување претпоставуваат дека човечкиот набљудувач е неутрален, но тоа не беше случај во нашата студија“, вели коавторот д-р Јанина Бенедети од Чешкиот универзитет за биолошки науки во Прага.
Таа додаде дека птиците очигледно реагираат на суптилни сигнали што луѓето не ги забележуваат лесно и дека идните истражувања треба да се фокусираат на индивидуалните фактори, како што се движењето, мирисот или физичките карактеристики, за да се утврди што точно птиците препознаваат.
