Органски јаглерод е откриен во глинени карпи на локалитетот Брајт Ангел, област низ која течела река пред милијарди години, влевајќи се во кратерот Језеро. Научниците веруваат дека присуството на вода можело да создаде средина погодна за развој на живот.
Зошто е ова откритие толку важно?
Откритието е особено важно бидејќи инструментот „Шерлок“ на роверот „Персеверанс“ користел ултравиолетов ласер за да идентификува макромолекуларен јаглерод во карпа наречена Чејава Фолс. Исто така, значајно е што органскиот материјал е пронајден на површината на карпата, која успеала да им се спротивстави на зрачењето и на хемиската оксидација — процеси кои инаку брзо би ги уништиле таквите траги на Марс.
Необичните дамки на карпите што потсетуваат на шеми што на Земјата ги оставаат фосилизирани микроорганизми дополнително го привлекоа вниманието на научниците.
„Ова би можело да биде најјасниот знак за живот што некогаш сме го пронашле на Марс“, рече Шон Дафи, поранешен вршител на должноста директор на НАСА.
Ова не е првпат да се пронајдат органски траги на Марс. Тие претходно беа забележани од роверот „Кјуриосити“ на локација оддалечена повеќе од 3.200 километри, што дополнително ја зајакнува претпоставката дека условите погодни за живот некогаш биле широко распространети низ целата планета.
Конечниот одговор ќе мора да почека
Сепак, конечен одговор сè уште не може да се даде. Органската материја може да се создаде и преку небиолошки геолошки процеси, поради што се неопходни детални лабораториски анализи на Земјата.
Како што објаснува истражувачот од Лабораторијата за млазен погон на НАСА, Кајл Укерт, инструментите на роверот не можат со сигурност да разликуваат дали пронајдените соединенија се од биолошко или од неживо потекло. Затоа, клучните докази ќе бидат можни дури откако примероците ќе бидат доставени до лабораториите на Земјата.
Сепак, програмата на НАСА за враќање примероци од Марс во моментов е забавена поради недостаток на средства, а нов план се очекува дури во следната деценија.
Меѓутоа, Кина планира своите први примероци од Марс да ги донесе на Земјата до 2031 година, што значи дека токму таа би можела да го направи едно од најголемите научни откритија ако прва го потврди постоењето на древен живот на Марс.
