На отворањето присуствуваа високи претставници на Сојузното министерство за земјоделство, храна и регионален идентитет на Германија, Германската амбасада, како и министерот за земјоделство, шумарство и водостопанство Цветан Трипуновски.
Трипуновски истакна дека преку меѓународна соработка и примена на научни достигнувања може да се создаде поотпорно, поконкурентно и поодржливо земјоделство, кое ќе одговори на предизвиците што ги носат климатските промени.
„Развојот на паметно и одржливо земјоделство базирано на знаење, иновации и дигитални технологии е еден од клучните приоритети. Отворањето на ова демонстрациско поле претставува важен чекор во тој процес“, нагласи министерот.
Проектот има за цел да помогне земјоделското производство да остане стабилно и во услови на суши, температурни екстреми и нерамномерни врнежи. Во рамки на активностите ќе се тестираат современи решенија како прецизно наводнување, сензори, метеоролошки станици, системи за далечинско следење, дронови, соларни панели и антифрост системи.
Експерименталното поле е воспоставено во соработка со Факултетот за земјоделски науки и храна и ќе служи како практична лабораторија за студенти, земјоделци, истражувачи и стручни лица кои ќе можат директно да ги следат резултатите од примената на новите технологии.
Ректорката на Универзитетот „Св. Кирил и Методиј“, Билјана Ангелова, истакна дека проектот има и значајна образовна димензија, бидејќи им овозможува на студентите да стекнат практични знаења преку непосредна работа на терен.
На дел од површината е засаден опитен насад со сливата „Стенли“, додека на други парцели се одгледуваат сточен грашок, сирак и пченка, со цел тестирање на различни практики за климатска адаптација.
Директорот на GIZ, Давид Оберхубер, нагласи дека македонско-германската соработка во земјоделството трае повеќе од 30 години и дека денес е насочена кон справување со сè поизразените последици од климатските промени.
Активноста е дел од поширока регионална програма на германската влада за поддршка на земјите од Западен Балкан во спроведувањето на Зелената агенда. Покрај земјава, слични демонстрациски проекти се реализираат и во Албанија, Косово и Босна и Херцеговина, со цел развој и примена на практични решенија за климатска отпорност.
