„Делегации од Кабинетот на Претседателот на Република Северна Македонија, по повод 20-годишнината од загинувањето на осум армиски резервисти кај месноста Љуботенски бачила, денеска положија цвеќе пред спомен-обележјата во општина Ѓорче Петров и во Волково, пред спомен-обележјето во село Љубанци и во касарната „Илинден’ во Скопје“, се вели во соопштението од кабинетот на шефот на државата.
На 10 август 2001 година на патот кај месноста Љуботенски бачила, скопско, животот го загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски.
