Со предложените измени на Законот за граѓанска одговорност е предвидено значително намалување на сумата што ќе ја плаќаат новинарите за изгубен спор за клевета или навреда од сега предвидените 2.000 евра на максимални 400 евра.
Се предлагаат членови со кои во иднина нападот врз новинар, снимател или фоторепортер ќе се третира исто како напад врз службено лице.
На оваа своја седница Владата го утврди текстот на предлог-законот за исплата на паричен надоместок на жртви од кривични дела, како и измените и дополнувањата на Законот за заштита на физичките лица во врска со обработката на личните податоци заради цели на спречување, истрага, откривање или гонење на кривични дела или за извршување на кривични санкции, на Законот за Академија на судии и обвинители, Законот за парнична постапка, на Законот за граѓанска одговорност за навреда и клевета, како и Кривичниот законик, соопшти Владата.
