„Едно лице, преку лажни профили, но и од сопствениот профил, испрати навредливи и заканувачки пораки до членовите на семејството на извршниот директор на ФОП, Бленди Ходаи. Ја информираме јавноста и сите оние што имаат намера да тргнат по сличен пат: сите случаи се пријавени во Секторот за внатрешни работи во Тетово. Се преземаат сите потребни мерки за расветлување на случајот. Заканите кај нас не поминуваат. Универзитетот во Тетово ќе се ослободи од криминалот и од академските криминалци“, соопштија од ФОП.
Директорот Ходаи вели дека колку повеќе се закануваат, толку појасно станува дека сме допреле нешто што ве боли.
„Во полициската станица во Тетово го пријавив последниот случај на закани. Органите на редот ќе се занимаваат со секого што овие денови ќе се осмели да ми се закани мене, на моето семејство или на моите колеги. Многу добро знаете дека со мене заканите не функционираат. Вистината ќе ја извадиме до крај. Ама не пробувајте повторно со моето семејство — таа е црвена линија што не се поминува“, напиша активистот Ходаи.
Форумот за образовни промени (ФОП) пред три дена објави дека Арбреша Беџети Ферати, сопруга на претседателот на Сенатот на Универзитетот во Тетово, била унапредена во редовна професорка, со што биле прекршени 15 законски и статутарни одредби. Овие прекршувања биле регистрирани и од Државниот просветен инспекторат.
