„Овие алатки не овозможуваат и не се користат за прислушување, туку претставуваат стандардна опрема за дигитална форензика, каква што се користи и од други безбедносни институции ширум светот.
Напоменуваме дека ист софтвер бил набавен и во 2021 година, во време кога Министерството било раководено од министер од политичката партија СДСМ, што како факт сам по себе ја нагласува противречноста на денешните обвинувања.
Набавката е спроведена транспарентно и во согласност со Законот за јавни набавки и има единствена цел да го засили капацитетот на Одделот за форензички испитувања во откривање и докажување на кривични дела.
Министерството апелира до сите политички чинители да се воздржат од пласирање на дезинформации кои ја поткопуваат довербата во институциите. Очекуваме поддршка за професионалното и законито постапување на службите во интерес на јавната безбедност.
Борбата против криминалот мора да биде заеднички приоритет, а не повод за политички конструкции што одговараат само на оние кои се плашат од функционални институции и владеење на правото“, се вели во реакцијата на МВР.
Со реакција се јави и ВМРО-ДПМНЕ кои велат дека „наводите на СДС дека е набавен софтвер за прислушување во МВР се невистина и брутална лага. Очекуваме СДС да се извинат. Софтверите се набавуваат за системот за форензика кој е набавен од СДС кога тие биле на власт“.
