Со извонредни настапи, богата кореографија и автентична изведба на македонските народни песни и ора, членовите на ансамблот достојно ја претставија Македонија, оставајќи силен впечаток кај публиката и стручното жири.
Освоеното прво место претставува големо меѓународно признание за македонскиот фолклор и потврда за посветената работа, талентот и љубовта кон традицијата што со години ги негуваат членовите на „Студио Фолклор“.
„ Интернационалниот фолк фестивал Тирана, традиционално собира ансамбли од повеќе земји, а годинава учествуваа претставници од девет држави. Во силна меѓународна конкуренција, македонскиот ансамбл успеа да го освои највисокото признание и уште еднаш да покаже дека македонската култура и фолклор се високо ценети и препознатливи надвор од границите на државата“, објави весникот “Илинден”.
Оценува дека овој успех е повод за гордост не само за ансамблот, туку и за целата македонска културна јавност, која доби уште една потврда дека традицијата, кога се негува со љубов и посветеност, продолжува достојно да ја претставува Македонија на меѓународната сцена.
„Ова не е само победа, туку голема чест и признание за сите кои несебично работат на зачувување и промоција на македонската традиција. Горди сме што достоинствено ја претставивме Македонија и што нашата култура повторно беше препознаена како една од најдобрите“, порачаа организаторите на македонската делегација.
Од тимот упатија благодарност до сите членови на ансамблот, кореографите, музичарите и поддржувачите кои придонеле за овој значаен успех.
„Победата на Интернационалниот фолк фестивал Тирана претставува уште еден доказ дека македонскиот фолклор продолжува да живее, да инспирира и да освојува признанија на меѓународните фестивалски сцени, промовирајќи ги богатата традиција, култура и национален идентитет“, се вели во објавата на весникот „Илинден” од Тирана.
