Трамп ги обвини телевизиите што не го емитувале неговото обраќање дека учествуваат во „заговор“ и побара да им бидат одземени дозволите за емитување.
„Лажните вести Ен-би-си и Еј-би-си соопштија дека нема да го пренесуваат овој говор. Ваква измама треба да значи одземање на нивните дозволи“, рече Трамп.
Експертите посочуваат дека телевизиските мрежи, врз основа на Првиот амандман на американскиот Устав, имаат право самостојно да одлучуваат што ќе емитуваат. Сепак, во минатото најчесто ги пренесувале претседателските обраќања за прашања од национално значење.
Еј-би-си го емитуваше говорот само преку својата интернет-платформа и радио, додека Ен-би-си го пренесуваше на бесплатниот стриминг-сервис, но не и на главниот телевизиски канал. Си-ен-ен обезбеди пренос на својата интернет-страница и на претплатничката платформа.
Во говорот Трамп објави декласифицирани разузнавачки документи за кои тврдеше дека покажуваат кинеско мешање во американските избори. Американската разузнавачка заедница претходно заклучи дека нема докази оти Кина ги изменила гласањето или резултатите од изборите во 2020 година.
Некои демократи, меѓу кои и конгресменката Александрија Окасио-Кортез, претходно ги повикаа телевизиите да не го пренесуваат обраќањето, оценувајќи дека Трамп ќе ги повторува веќе побиените тврдења за изборни измами.
Си-би-ес ја прекина редовната програма и го емитуваше говорот, но водителот Тони Докупил пред почетокот предупреди дека „голем дел од она што претседателот го кажуваше на оваа тема е неточно“.
Телевизијата го прекина преносот по околу 15 минути за да ги провери и побие тврдењата на Трамп. Фокс њуз го пренесуваше целиот говор во живо.
Одлуката на телевизиите доаѓа во период на силен притисок врз американските медиуми. Еј-би-си се соочува со истраги од Федералната комисија за комуникации, додека Трамп постојано ги напаѓа Ен-би-си, Си-ен-ен и нивните сопственици поради, како што тврди, пристрасно известување.
Претседателот на Федералната комисија за комуникации Брендан Кар претходно изјави дека телевизиските мрежи треба да го емитуваат говорот, бидејќи американската јавност има право да го слушне преку националните телевизиски фреквенции.
