Обраќањето во ударен термин, кое траеше 25 минути, го истакна настојувањето на Трамп безбедноста на изборите да ја претвори во централно политичко прашање пред изборите за Конгресот во ноември, на кои неговите републиканци ќе го бранат тесното мнозинство.
Трамп повторно ги повика републиканците во Конгресот да усвојат закон со кој би се вовеле нови барања за идентификација на гласачите и докажување на американско државјанство, и покрај долгогодишните наоди дека изборните измами во САД се ретки. Законот е заглавен во Сенатот поради силното противење на демократите.
Трамп тврди дека постојат „шокантни слабости“
Трамп рече дека материјалите од кои е тргната ознаката на тајност ќе откријат „шокантни слабости во нашата изборна инфраструктура“. Меѓутоа, голем дел од документите изгледа го покажуваат спротивното или воопшто не се поврзани со американската изборна инфраструктура.
Говорот дојде во политички тежок момент за Трамп и републиканците, бидејќи неговата популарност е погодена од непопуларната војна со Иран и високите цени на енергијата. Во почетокот Трамп накратко ја спомна војната, велејќи дека САД „убедливо победуваат“, а потоа наброја низа домашни постигнувања, меѓу кои даночните намалувања и строгата имиграциска политика, пред да премине на безбедноста на изборите.
Претседателот рече дека декласифицира чувствителни информации што покажуваат дека Кина незаконски дошла до досиеја за 220 милиони американски гласачи, вклучително и имиња, адреси и други податоци.
Тој тврдеше дека припадници на американската разузнавачка заедница намерно ги прикривале информациите за обемот на кинеските активности.
Во јавна процена на американското разузнавање од 2021 година беше утврдено дека нема индиции оти кој било странски фактор се обидел или успеал да го измени „кој било технички аспект“ од претседателските избори во 2020 година, вклучително и регистрацијата на гласачите, гласачките ливчиња, пребројувањето или резултатите.
Проценката беше изработена во времето кога Џон Ретклиф беше директор на Националното разузнавање на Трамп, а денес е директор на ЦИА.
Во извештајот исто така беше наведено дека Кина најмалку од 2008 година спроведувала активности за собирање информации за американските гласачи, јавното мислење, политичките партии, кандидатите и највисоките владини функционери, најверојатно со цел тие податоци да ги користи за предвидување на изборните резултати.
Две лица запознаени со прашањето рекле дека податоците за американските гласачи до кои дошла Кина не биле доверливи, бидејќи политичките консултанти редовно ги купуваат избирачките списоци, и дека не можеле да бидат изменети.
Пред говорот на Трамп, некои претставници на Белата куќа изразиле загриженост дека објавувањето на информациите за Кина може да создаде погрешна слика, рекле извори за Ројтерс.
Острата реторика на Трамп кон Кина може да ги наруши односите што се стабилизираа по скапата трговска војна минатата година. Трамп се надева дека во септември ќе се сретне со кинескиот претседател Си Џинпинг за подобрување на трговските односи.
Кинеското Министерство за надворешни работи не одговорило веднаш на барањето за коментар за говорот.
Пред обраќањето, Лиу Чанг, портпарол на кинеската амбасада во Вашингтон, изјави: „Кина никогаш не се мешала и никогаш нема да се меша во претседателските избори во САД.“
Познати тврдења што ги повторува со години
Трамп со години ги доведува во прашање изборните резултати, лажно тврдејќи дека неговиот пораз од демократот Џо Бајден во 2020 година бил наместен.
Тој изнесуваше и други неточни тврдења, меѓу кои дека гласањето по пошта е преполно со измами, дека машините за гласање не се доверливи и дека гласањето на лица без американско државјанство е широко распространето.
Многубројни судови и повторни пребројувања не најдоа докази за голема измама на изборите во 2020 година.
Сепак, кампањата на Трамп доби поддршка меѓу неговите гласачи. Анкетата на Ројтерс и Ипсос од април покажа дека 63 проценти од републиканците веруваат во неговото тврдење дека изборите во 2020 година биле украдени, процент што речиси не се менува со години и покрај недостигот од докази.
Трамп во четвртокот рече дека неговата администрација открила повеќе од 275.000 лица без американско државјанство регистрирани за гласање во само четири сојузни држави, но не беше јасно колку од нив навистина гласале.
Во некои претходни случаи, системите за проверка на државјанството по грешка означувале натурализирани американски државјани како лица без државјанство. Истражувањата покажуваат дека гласањето на лица без американско државјанство е исклучително ретко.
Трамп исто така рече дека новодекласифицираните документи ќе откријат сериозни слабости во изборната безбедност. Но голем дел од нив изгледа не се совпаѓаат со неговото тврдење или воопшто не се однесуваат на американската изборна инфраструктура:
– Еден документ на ЦИА, изработен минатиот месец, се однесувал на изборите во Венецуела, а не во САД.
– Во друг документ се наведува: „Проценуваме дека системите за пребројување на гласовите би било тешко да се манипулираат во доволно голем обем за да се загрозат изборните резултати.“
– Трет документ, изработен од ЦИА, ги опишува обидите на кинеските разузнавачи да ја таргетираат кампањата на Бајден и наведува дека Пекинг „во тој момент немал намера тајно да се меша со цел да влијае врз исходот на изборите“, иако се додава дека Кина подоцна би можела да одлучи поинаку.
„Наводните шокантни откритија на Трамп за Кина се целосно лажни“, изјави демократскиот сенатор Марк Ворнер, потпретседател на Сенатскиот комитет за разузнавање.
„Факт е дека нашите разузнавачки агенции едногласно се согласија дека Кина не се ни обидела да промени ниту еден глас на изборите во 2020 година“, додаде тој.
Политички тешкотии пред изборите
Иако Трамп ги претстави американските избори како исклучително ранливи, тој не понуди докази дека кој било глас на изборите во 2020 година бил изменет или манипулиран.
Две од трите најголеми американски телевизиски мрежи и Си-ен-ен одлучија да не го пренесуваат говорот на своите главни канали, отстапувајќи од практиката што обично се применува за големи обраќања за прашања од национално значење.
Трамп повторно ги повика републиканските законодавци да го поддржат законот СЕЈВ Америка, со кој би се барала лична карта со фотографија за гласање и доказ за американско државјанство при регистрација, а гласањето по пошта значително би се ограничило.
Демократите и организациите за заштита на избирачките права тврдат дека целта на законот е да се спречат легитимни гласачи да гласаат.
Законот неколкупати беше усвоен со просто мнозинство во Претставничкиот дом, кој е под контрола на републиканците, но ги нема 60-те гласа потребни за надминување на демократската опструкција во Сенатот.
Некои републикански лидери го повикаа Трамп да се фокусира на прашањата што најмногу ги засегнуваат Американците, меѓу кои високите животни трошоци, наместо на изборите во 2020 година.
На демократите им се потребни само три дополнителни места за да освојат мнозинство во Претставничкиот дом со 435 места.
Сепак, тие се соочуваат со потешка задача за освојување на контролата врз Сенатот со 100 места, бидејќи клучните изборни трки се одвиваат во сојузни држави што традиционално се наклонети кон републиканците.
