Многубројниот верен народ што го беше преполнил храмот се причести со светите христови тајни.
Празнични богослужби денеска се одржуваат во сите храмови на МПЦ-ОА.
Празникот особено торжествено се одбележува во манастирскиот комплекс Свети Наум на Охридското Езеро.
Култот на Свети Наум е мошне силен кај охридските верници, кои секоја година на празникот во манастирскиот комплекс доаѓаат во голем број, да се помолат за своето и за здравјето на нивните најблиски, бидејќи се верува дека Свети Наум Охридски имал чудесна моќ на излекување и дека бил голем исцелител. Покрај православни верници на празникот на светецот бројни се и гости од странство, како и граѓани од другите вероисповести кои го почитуваат делото на Свети Наум Охридски.
Свети Наум Охридски со Свети Климент Охридски се најпознатите и најзначајни ученици на светите браќа Кирил и Методиј. Учествувал во Моравската мисија, во Рим кон крајот на 867 или почетокот на 868 бил посветен во духовен сан, а по смртта на Методиј во 885 година преку Бугарија дошол во Македонија. На брегот на Охридското Езеро изградил манастир што го носи неговото име. Умрел во 910 година и наскоро по смртта бил прогласен за светец. Неговите ученици за него напишале житија и служба.
Свети Наум освен по црковната дејност е познат и како македонски средовековен писател и културен деец.
