Во првите три дена од овој месец регистрирани се 43 пожари на отворен простор, нагласи Ангелов.
„Упатувам апел до поголемиот број македонски граѓани коишто имаат свои викендици или стари куќи во делумно или целосно напуштени села, да се погрижат за нивните дворови. Во валандовско постоеше опасност да изгорат неколку куќи во кои сè уште живеат возрасни луѓе кои го запуштиле дворот и им изникнала трева повисока од еден метар, со што пожарот можеше да дојде до нивниот праг и куќите да ги запали. Апелирам граѓаните да ја искосат тревата и на тој начин ќе ни помогнат во гаснењето на пожарите бидејќи со вакво темпо и според прогнозите најверојатно ќе имаме многу тешко лето со многу пожари за гаснење и нашиот фокус наместо кон гаснење на пожарите, ќе треба да биде кон одбрана на населените места“, истакна Ангелов.
Од ДЗС информираа дека дирекцијата во овој момент има еден функционален ер-трактор, вториот ер-трактор со завршување на сервисирањето треба да пристигне наредната недела, а за третиот не може да се даде точна информација.
„Сакам да ја известам јавноста дека благодарение на премиерот и Владата, платата на вработените во авиоодделението во ДЗС е двојно зголемена и тоа ќе биде мотивирачки фактор вработените да останат да работат во ДЗС. Воедно ги повикувам на разговор пилотите што имаат професионална дозвола за летање, а не се ангажирани, да дојдат на дообука и да се стекнат со дозвола за ер-трактор“, посочи Ангелов.
На прес-конференција во ДЗС, директорот Ангелов информира за надлежностите на дирекцијата и работата на внатрешната инспекција и инспектори чиј вкупен број е 15, а потребно е да бидат 35, проблем кој во наредниот период ќе се решава.
„Ги повикувам сите граѓани и посебно земјоделците да не палат огнови на отворено, да не се палат стрништа, да не се пали сувата трева, да не се палат пасиштата, да не се палат грмушки. Да се почитуваат правилата за движење низ шуми бидејќи движењето не е забрането, само е потребна најава и дозвола за движење низ шумите“, појасни Ангелов.
Од ДЗС потврдија дека во случај на кризна состојба ќе бидат употребени и специјални возила транспортери за гаснење на пожари, кои ќе бидат препознатливи и со црвена боја.
