Почна 79-от Кански филмски фестивал

79-то издание на Канскиот филмски фестивал свечено почна во гламурозна атмосфера на Француската ривиера, претворајќи го Кан во центар на светската кинематографија. Фестивалот беше отворен со црвен тепих, висока мода и присуство на многубројни филмски ѕвезди, додека 22 филма ќе се натпреваруваат за престижната Златна палма. На отворањето почесна Златна палма му беше врачена на новозеландскиот режисер, сценарист и продуцент Питер Џексон, познат по трилогиите „Господарот на прстените“ и „Хобит“. Тој пристигна во елегантен стил и беше пречекан со огромен аплауз од присутните. Големо внимание привлече и жирито на фестивалот, во кое во модерен и софистициран стил блескаше актерката Деми Мур. Покрај неа беа и режисерот Диего Сеспедес, белгиската режисерка Лаура Вандел, сценаристот Пол Лаверти, корејскиот режисер Парк Чан-вук, актерот Исак де Банколе, актерката Рут Нега, шведската ѕвезда Стелан Скарсгард и оскаровката Клои Жао. Меѓу ѕвездите што привлекоа огромно внимание беа Диего Луна, Џејмс Франко, како и актерот од „Хобит“ Мартин Фриман. На црвениот тепих блескаше и супермоделот Хајди Клум во спектакуларна висока мода, додека големо внимание привлече и Карлос Саинц Џуниор, шпански возач на Формула 1. Вечерта кулминираше со премиерата на филмот Електричната Венера на режисерот Пјер Салвадори, додека црвениот тепих беше исполнет со познати личности, луксуз и впечатливи модни изданија, потврдувајќи уште еднаш дека Кан останува најпрестижниот филмски фестивал во светот.