По победата во вториот круг од прелиминарните избори, конзервативниот градоначалник на едно унгарско гратче и политички аутсајдер без партиска припадност ќе ја предводат опозицијата, која за првпат има „разумни шанси“ против популистичкиот премиер Виктор Орбан, оценуваат светските медиуми, пренесува Радио Слободна Европа (РСЕ).
Политичкиот аутсајдер Петер Марки-Зај ќе го предводи обединетиот опозициски блок на парламентарните избори во Унгарија во 2022 година во обид да го собори Виктор Орбан по повеќе од десет години на власт, вели Би-би-си.
Марки-Зај во вториот круг од прелиминарните избори на 17 октомври ја победи левичарката Клара Добрев, која потоа се обврза дека ќе го поддржи на чело на сојузот на шест опозициски партии.
Според анкетите, додава Би-би-си, 49-годишниот Марки-Зај има најголеми шанси да го собори десничарскиот премиер, чија партија Фидес е на власт од 2010 година и која со години има корист од расцепканата опозиција.
Во изјавата по изборите Фидес наведе дека нивниот ривал потпишал пакт со политичката левица со цел да им помогне да се вратат на власт и да ги зголемат даноците.
Новиот лидер на опозицијата се прослави во 2018 година со победата на изборите за градоначалник во јужниот град Ходмезовашархеј, кој важеше за упориште на Фидес.
Разновидна група од шест опозициски партии се собра во обид да го порази Орбан, организирајќи прелиминарни избори за избор на заеднички кандидати и во одделни изборни единици и за функцијата премиер, вели Политико.
До сојузот дојде поради загриженоста дека актуелниот унгарски изборен систем, осмислен од Фидес, ѝ отежнува на опозицијата да го собори моќниот премиер на земјата, ако на изборите се кандидираат одвоено.
Во вториот круг од прелиминарните избори, зад Марки-Зај застанаа либерални, левичарски и центристички политичари, тврдејќи дека тој има најголеми шанси да го победи Орбан.
Обраќајќи им се на поддржувачите во Будимпешта, Марки-Зај вети дека ќе работи на промена на унгарската политичка култура и ја повика земјата да се обедини.
За првпат од доаѓањето на власт, Орбан следната година ќе се соочи со обединет фронт од опозициски партии, кој ги вклучува социјалистите, либералите и партијата Јобик, некогаш екстремна десница, а сега десноцентристичка, посочува Ројтерс.
Марки-Зај беше пријатен избор и за левите и за конзервативните гласачи, а неговиот имиџ како семеен човек и татко на седум деца, како и христијанската вера, најверојатно ќе им се допадне на многу неопределени гласачи, посочува Ројтерс, додавајќи дека новиот лидер на опозицијата има докторат по економија, маркетинг и инженерство.
За време на кампањата, тој вети дека ќе ги премости поделбите во општеството и ќе ја сузбие корупцијата, велејќи дека тој и Добрева се согласиле дека одржувањето обединета опозиција е од витално значење.
Обединетата опозиција, најавија тие, ќе се обиде да ја растури „нелибералната држава“ на Орбан, вклучувајќи ги нејзините идеолошки основи, унгарскиот устав и серијата нови закони за кои критичарите велат дека му помогнале на Орбан да ја зацврсти својата моќ.
Додека Орбан бележи низа спорови со Европската Унија, и Марки-Зај и Добрев се обидуваат да ги подобрат односите со Брисел и се залагаат Унгарија да го воведе еврото во скора иднина.
Во изјава за Фајненшл тајмс, Марки-Зај рече дека неговата кандидатура е силна порака до Европската Унија и дека неговата кампања ќе продолжи да се фокусира на прозападниот став спротивен на Орбановата политика на „отворање кон истокот“, со која се приближи до Русија и Кина, додека со Брисел имаше чести конфликти.
Повеќе од 600.000 Унгарци учествуваа во двата круга од прелиминарните избори, што во земја со 10 милиони жители е ниво на ангажираност за кое Марки-Зај рече дека му дава голем легитимитет.
Иако анкетите на јавното мислење пред изборите во април најверојатно ќе покажат еднакви сили меѓу обединетата опозиција и владејачката партија Фидес, Марки-Зај ќе се соочи со тешка битка, посочува Блумберг.
За време на 11-те години непрекинато владеење, Орбан го смени уставот, ги промени изборните единици и го прошири своето влијание во медиумите и судовите. Тој се залагаше за неговата имигрантска, нелиберална агенда како одбрана на христијанските и конзервативните вредности.
Неговиот успех ги инспирираше, според Блумберг, популистичките лидери во Европа, да ги копираат неговите политички програми, поради што ЕУ ја лиши Унгарија од милијарди евра помош поради сомневања за кршење на владеењето на правото.
Иако следува тешка битка за победа над Орбан, аналитичарите веруваат дека опозицијата за првпат има „разумни шанси“ против популистичкиот лидер обвинет дека ја уназадил демократијата во земјата во текот на повеќе од една деценија на власт, пишува Вашингтон пост.
Опозицијата ја искористи стратегијата за здружување на силите на локалните избори во 2019 година и победи во повеќето области во Будимпешта и други градови.
Во април, додава вашингтонскиот весник, таа тактика за прв пат ќе биде тестирана на националните парламентарни избори, а сегашниот опозициски пакт значи дека ќе имаат заеднички кандидат во сите 106 директно избрани места во Унгарија.
