Во меѓувреме, украинскиот дрон со долг дострел, произведен во земјата, погоди руска нафтена рафинерија и терминал на Црното Море по трет пат за помалку од три недели, што доведе до евакуација на околните жители, а Русија издаде предупредување за можни еколошки последици.
Украина разви напредна технологија за дронови што се покажа како суштинска во одбивањето на руските воени напади и го привлече вниманието на светот, објавува АП.
Дронови-пресретнувачи како дел од сеопфатен систем за воздушна одбрана сега се бараат на Блискиот Исток и во земјите од Заливот поради војната во Иран, изјавија украинските власти.
Украина ги зголемува залихите на дронови-пресретнувачи за да ги спречи руските воздушни напади, а нејзината војска воспостави нова команда во рамките на воздухопловните сили за да ги зајакне капацитетите на земјата, изјави министерот за одбрана Михајло Федоров во објава на Телеграм во понеделник.
Офанзивните капацитети на Украина исто така се подобрени, а Министерството за одбрана вчера соопшти дека вооружените сили на земјата го зголемиле повеќе од двојно опсегот на своите ударни капацитети од почетокот на руската инвазија во февруари 2022 година.
Тогаш, украинските сили можеа да погодат воени цели на околу 630 километри оддалеченост, соопшти министерството, додавајќи дека сега погодуваат цели дури 1.750 километри зад непријателските линии.
Со подобрувањето, Украина можеше да погоди руски нафтени инсталации кои ѝ обезбедуваат на Москва важни приходи. Исто така, целеше фабрики кои ги снабдуваат руските вооружени сили.
Украина вчера по трет пат овој месец погоди руска рафинерија за нафта во пристаништето Туапсе на Црното Море, во координирана операција во која учествуваа повеќе гранки на вооружените и безбедносните служби на земјата, соопштија вооружените сили на земјата.
