Рускиот министер за надворешни работи истакна дека на самитот во Алјаска, претседателите на Русија и САД, Владимир Путин и Доналд Трамп, разговарале за предлозите на Вашингтон за Украина, кои руската страна ги прифатила.
„Секако, целата оваа ситуација треба да се разјасни. Но, фактот останува: американските предлози беа разгледани во Алјаска, а руската страна ги прифати“, изјави денеска Лавров, пренесе РИА Новости.
Лавров истакна дека затоа не е многу пристојно од страна на американскиот државен секретар Марко Рубио да тврди дека во Енкориџ не е постигнат никаков договор.
„Кога мојот колега Марко Рубио вели дека на Алјаска имало само предлози, но не и договор, тоа кај мене поставува прашање за тоа што подразбираме под договор. Ако една страна, во овој случај Соединетите Држави, стави на маса свои предлози за решение за тоа како да се пристапи кон оваа криза, а другата страна изрази согласност со тие предлози, тогаш да се каже дека немало договор изгледа доста нељубезно“, изјави Лавров пред новинарите.
Тој исто така потсети дека неколку дена пред средбата меѓу рускиот и американскиот претседател во Алјаска, претставникот на американскиот претседател Стив Виткоф ја посети Москва, носејќи ги истите предлози од претседателот Доналд Трамп.
На состанокот во Москва, претседателот Владимир Путин вети дека ќе одговори на самитот во Енкориџ.
„Веќе во Енкориџ, кога двајцата претседатели седнаа да преговараат, Марко Рубио и јас бевме таму, претседателот Путин, гледајќи го Виткоф, кој исто така беше таму, почна да ги наведува американските предлози точка по точка. По секоја точка, во присуство на американскиот претседател Трамп и државниот секретар Рубио, го праша Виткоф дали правилно ги означил идеите што ги донел во Москва денот пред Енкориџ. Виткоф одговори потврдно на секое негово прашање“, додаде Лавров.
Новинската агенција ТАСС објави дека Рубио во четвртокот изјавил дека „нема договор во Алјаска – имало предлог во Алјаска“.
