Истрагата се однесува на најмалку четири случаи во кои трговци оствариле вкупна добивка поголема од 2,6 милијарди долари обложувајќи се на пад на цените на нафтата пред тоа навистина да се случи, објавија американските телевизии Еј-би-си њуз и Ен-би-си њуз, повикувајќи се на извори запознаени со случајот.
Наводно, обложувањата биле поставени кратко пред нови објави на Трамп или функционери на иранската влада. Во истрагата учествува и Комисијата за тргување со стоковни фјучерси, федерална агенција одговорна за тргување со суровини.
Според Еј-би-си њуз, трговците во март вложиле повеќе од 500 милиони долари на пад на цената на нафтата непосредно пред американскиот претседател да објави одложување на заканите за напади врз иранската електроенергетска мрежа.
Во април следувале уште три трансакции што сега се под истрага.
На 7 април, трговци наводно вложиле 960 милиони долари на пад на цената на нафтата кратко пред Трамп да објави привремен прекин на огнот.
На 17 април, шпекуланти вложиле 760 милиони долари на пад на цената на нафтата, 20 минути пред иранскиот министер за надворешни работи Абас Арагчи да објави повторно отворање на Ормускиот теснец.
Конечно, на 21 април, неидентификувани инвеститори вложиле 430 милиони долари на пад на цената на нафтата, 15 минути пред објавата на Трамп за продолжување на прекинот на огнот.
Извор за Ен-би-си њуз изјавил дека истрагата сè уште е во рана фаза и дека засега нема докази за кривично дело.
Покрај тековната истрага, истражителите во посебна постапка планираат да испитаат и сомнителни активности на платформи за шпекулативно тргување, што исто така е поврзано со иранскиот конфликт.
Цените на нафтата и гасот нагло пораснаа на светските пазари поради американско-израелската војна против Иран.
