„Ставот на Соединетите Американски Држави е јасен, не можеме да поддржиме никакви мерки што не го осудуваат Хамас и не го повикуваат да се разоружа и да ја напушти Газа“, изјави амбасадорката на САД во ОН, Дороти Шеа, пред гласањето.
„Оваа резолуција би го охрабрила Хамас и би ги поткопала дипломатските напори за постигнување прекин на огнот што би ја земал предвид реалната ситуација на терен“, рече таа за документот предложен од 10 од 15-те членки на Советот за безбедност.
Останатите 14 земји гласаа за прифаќање на нацрт-резолуцијата, но како една од петте постојани членки на Советот, САД имаат право на вето.
Израел ги отфрли барањата за безусловен и траен прекин на огнот, велејќи дека Хамас не може да остане во Газа. Откако двомесечното примирје заврши во март оваа година, Израел продолжи со воена офанзива во палестинската енклава, барајќи ослободување на заложниците што ги држеше Хамас.
Пред гласањето во Советот за безбедност, главниот официјален претставник на ОН за хуманитарна помош, Том Флечер, уште еднаш апелираше на хуманитарните организации да им се дозволи да дистрибуираат пакети до жителите на Газа, нагласувајќи дека тие имаат план, залихи и искуство во слични ситуации.
„Отстранете ги ограничувањата за тоа каква и колку помош можеме да донесеме. Погрижете се нашите конвои да не се задржуваат поради одложувања и одбивања“, рече Флечер. ОН долго време го обвинува Израел за попречување на испораката и дистрибуцијата на хуманитарна помош во воената зона. Израел, од друга страна, возвраќа дека Хамас краде пакети со хуманитарна помош, обвинение што го негира.
