Русија во вторникот ги прекина услугите на мобилен интернет за многу корисници во Москва во пресрет на годишната парада по повод победата над нацистичка Германија, која е намалена поради заканата од напади со дронови од Украина, јавуваат новинарите на Ројтерс.
Русија оваа година ја заостри контролата врз интернетот, блокирајќи мобилни услуги и принудувајќи милиони луѓе да користат виртуелни приватни мрежи, што, според противниците на претседателот Владимир Путин, претставува обид за зацврстување на внатрешната контрола по четири години војна.
Кремљ соопшти дека ограничувањата се воведени за да се осигури безбедност поради зголемената закана од украински напади со дронови.
Шест новинари на Ројтерс во Москва изјавиле дека мобилниот интернет не работел на нивните телефони во вторникот во различни делови од главниот град. Телефонските повици и понатаму биле можни во многу делови од Москва, рекле тие.
Руските мобилни оператори соопштија дека може да има проблеми со мобилниот интернет поради потребата од обезбедување безбедност во наредните денови. Сбербанк, најголемата руска банка, исто така предупреди дека може да има проблеми со мобилниот интернет и испраќањето пораки.
Такси-службата на најголемата руска интернет-компанија Јандекс соопшти дека може да има проблеми со нарачување такси преку интернет поради ограничувањата.
Четири години по руската инвазија врз Украина во 2022 година, двете страни се вклучени во најголемата војна со дронови досега. Нивните дронови со долг дострел гаѓаат цели — од командни центри до енергетска инфраструктура — длабоко зад „зоните на смртта“ што ги создаваат дроновите со краток дострел долж линијата на фронтот.
