Книгата, насловена како „Ничија девојка: мемоари за преживувањето злоупотреба и борбата за правда“, излегува следната недела, а извадоци објави Њујорк пост.
Џуфре пишува дека по нападот, го замолила Епстин да интервенира, но тој ладно ѝ рекол дека „тоа едноставно е дел од работата“.
„По нападот, повеќе не можев да останам во тоа. Откако бев третирана толку брутално и ја видов бездушната реакција на Епстин на мојот страв, морав да прифатам дека неговата пофалба е само начин да ме држи покорна. Епстин се грижеше само за Епстин“, напиша таа во извадок објавен од Њујорк пост.
Џуфре во книгата не го именува премиерот, туку го нарекува само „Премиерот“, бидејќи, вели таа, се плашела дека може да ѝ наштети ако јавно го прозве. Но во претходните судски поднесоци таа го именувала израелскиот премиер Ехуд Барак како еден од влијателните мажи што ја силувале, обвинение што Барак постојано го негира.
Според мемоарите, Џуфре првпат се сретнала со „Премиерот“ на приватниот остров на Епстин на Американските Девствени Острови околу 2002 година, кога имала само 18 години. Епстин ѝ наредил да го однесе во соба, но штом останале сами, тој јасно ѝ ставил до знаење дека „сака насилство“.
„Повеќе пати ме давеше додека не ја загубив свеста и уживаше гледајќи ме како се плашам за мојот живот. Се смееше додека ме повредуваше и уште повеќе се возбуди кога го молев да престане. Ја напуштив собата крвава, со рани на устата, вагината и анусот. Со денови ме болеше кога дишев и голтав“, напиша Џуфре.
Таа додава дека тој „ја силувал побрутално од кој било друг досега“.
По нападот, таа веднаш истрчала кај Епстин и го замолила да не ја праќа повторно кај тој човек. „Клекнав и го преколнував. Не знам дали се плашеше од него или му должеше нешто, но не даде никакви ветувања. Ладно рече за бруталноста на политичарот: ‘Се случува понекогаш’.“
И покрај сè, Епстин наскоро повторно ја испратил кај „Премиерот“, овој пат на состанок во кабина на авионот „Лолита експрес“.
Иако искуството било помалку насилно, Џуфре постојано се плашела дека повторно ќе ја нападне или дави.
Џуфре признава дека, пред овој напад, се обидувала да верува дека Епстин некако „се грижи за девојките што ги искористуваше“.
„Знаев дека неговата склоност кон многу млади девојки е болест, но мислев, во неговиот изопачен свет, дека има добри намери“, напиша таа.
Но целосната рамнодушност на Епстин кон нејзиниот страв и болка ја натерала да ја сфати вистината. „Не знаев во тоа време, но мојата втора средба со премиерот беше почетокот на крајот за мене“, рече таа, додавајќи дека по тоа престанала да регрутира други млади девојки за Епстин.
Во еден застрашувачки пасус, таа ја предвидува сопствената смрт, пишувајќи дека „нема да го преживее животот на трговијата со луѓе“ и дека или самата ќе си го прекине животот или ќе ја убие „некој од пријателите на Епстин“.
Последната пресвртница се случила истата година кога Епстин и неговата блиска соработничка Гислен Максвел се обиделе да ја убедат Џуфре да им роди дете.
Понудата содржела вили, богатство и дадилки што работат 24 часа на ден, но од неа барале да се откаже од сите законски права. Тинејџерката веднаш се посомневала дека планираат да го искористат детето како идна жртва на трговија со луѓе и почнала да го планира своето бегство.
Успеала да избега од нивниот круг, но искуствата, пишува таа, ја прогонувале до крајот на животот – особено „алчниот, суров израз на лицето на премиерот додека ме гледаше како молам за мојот живот“.
Барак повеќе пати ги негираше сите обвиненија и тврдеше дека не знае ништо за мрежата на Епстин за трговија со луѓе.
Тој му беше личен пријател на Епстин и користеше милиони долари од средствата на Епстин за финансирање компанија за безбедносна технологија.
Записниците покажуваат дека тој престојувал на приватниот остров на Епстин и неколку пати патувал со неговиот авион.
Садомазохизмот на Епстин
Мемоарите вклучуваат шокантни описи на садомазохистички секс.
Таа вели дека Епстин со текот на времето развил интерес за него и почнал да „експериментира со камшици и окови и други инструменти за мачење“.
„Сесија по сесија, тој си ги остваруваше разните фантазии, со мене како жртва“, пишува таа.
Таа вели дека синџирите и направите што тој ги користел врз неа „предизвикувале толку многу болка што се молев да се онесвестам“. Но додава: „Кога ќе се онесвестев, се будев среде уште поголема злоупотреба“.
Џуфре, исто така, ги опишува физичките ефекти што таквата злоупотреба ги имала врз нејзиното тело, со темни кругови под очите и ребра видливи под кожата.
Наместо да понуди каква било грижа, Епстин била „згрозен“ од нејзиниот изглед, вели таа.
„’Не си истата девојка што беше’, ладно рече Епстин. ‘Треба да се исчистиш’“, пишува таа во книгата.
Обвинувања за принцот Ендру – и „оргиите“
Во мемоарите, Џуфре вели дека имала секс со британскиот принц Ендру во три одделни наврати.
Третиот пат, вели таа, бил на островот на Епстин како дел од она што Џуфре го нарекува „оргии“.
„Епстин, Енди и околу осум други млади девојки и јас имавме секс заедно“, вели таа.
„Другите девојки изгледаа под 18 години и не зборуваа англиски. Епстин се смееше за тоа како не можат да комуницираат, велејќи дека тоа се девојки со кои тој најлесно се сложува“.
Подоцна таа се сеќава дека видела фотографија од Епстин како шета во централниот парк на Њујорк со принцот Ендру, објавена во весниците низ целиот свет во 2011 година.
„Секако бев револтирана кога видов двајца од моите злоставувачи заедно, на прошетка“, пишува таа.
„Но најмногу бев изненадена што член на кралското семејство би бил доволно глупав да се појави јавно со Епстин“.
Принцот Ендру, кој постигна финансиски договор со Џуфре во 2022 година, постојано негираше какво било кривично дело. Во 2019 година тој за Би-би-си изјави дека воопшто не се сеќава дека некогаш ја сретнал Џуфре и дека тие „никогаш немале никаков сексуален контакт“.
Овие потресни сведоштва се дел од посмртните мемоари на Џуфре, кои таа ги напишала многу години пред да си го одземе животот во април на 41-годишна возраст. Книгата ќе биде објавена следната недела.
