Европската комисија првично му изрече казна од 4,3 милијарди евра во 2018 година, но таа во 2022 година беше намалена на 4,1 милијарди евра. Гугл поднесе жалба на таа одлука, но судот сега ја отфрли. Станува збор за најголемата парична казна што Европската комисија некогаш му ја изрекла на Гугл.
Портпаролот на Гугл соопшти дека пресудата „не ги препознава“ значајните вложувања на компанијата за „Андроид да остане отворен, интероперабилен и бесплатен“.
„Во секој случај, уште во 2018 година ги приспособивме нашите договори за да бидат усогласени со првичната одлука и остануваме посветени на понатамошни иновации и отвореност кон нашите корисници, партнери и програмери“, изјави тој.
Кога казната првпат беше објавена во 2018 година, Европската комисија утврди дека Гугл ги прекршил правилата за конкуренција на три начини:
ги обврзал производителите на Андроид-паметни телефони и таблети однапред да ги инсталираат апликацијата Гугл пребарување и прелистувачот Хром како услов за пристап до продавницата за апликации Гугл плеј;
им плаќал на големи производители на уреди и мобилни оператори на своите уреди исклучиво однапред да ја инсталираат апликацијата Гугл пребарување;
им се заканувал на производителите дека нема да им дозволи прединсталација на апликациите на Гугл доколку продаваат уреди со алтернативни верзии на Андроид.
Истовремено било утврдено дека верзијата на Андроид на Гугл не ги спречува корисниците подоцна да преземаат други интернет-прелистувачи или да користат алтернативни интернет-пребарувачи.
По изрекувањето на првата казна во 2018 година, извршниот директор на Гугл, Сундар Пичаи, напиша дека одлуката „го отфрла деловниот модел што го поддржува Андроид, а кој на сите им донесе повеќе избор, а не помалку“.
Ова не е првпат Европската комисија да се судри со Гугл и неговата матична компанија Алфабет.
Во септември 2024 година беше потврдена казна од 2,4 милијарди евра поради злоупотреба на доминантната положба на услугата за споредба на цени при интернет-купување.
Една година подоцна, во септември 2025 година, Гугл беше казнет со дополнителни 2,95 милијарди евра откако беше утврдено дека ги прекршил правилата за конкуренција давајќи им предност на сопствените производи при прикажувањето интернет-огласи, на штета на конкурентите.
Сепак, тоа не е најголемата казна што некогаш му била изречена на Гугл. Руски суд во октомври 2024 година покрена постапка против компанијата поради ограничување на работата на руските државни медиумски канали на Јутјуб и ѝ изрече казна од два ундецилиони рубљи, односно 20.000.000.000.000.000.000.000.000.000.000.000 долари – сума што го надминува вкупниот светски бруто-домашен производ.
