Денес до 11:00 часот наутро платформата за следење на морските патишта Кплер веќе регистрирала 15 транзити на товарни бродови само во текот на утрото. Ова ниво е споредливо со четвртокот и саботата кога сообраќајот беше до 30 транзити дневно.
Најмалку пет други бродови, чии транзити сè уште не се потврдени од Кплер се чини дека исто така поминале низ теснецот, покажале нивните АИС сигнали видливи на платформата Марин трафик.
Ормускиот теснец се отвори повторно минатата недела по договорот меѓу Иран и САД за завршување на војната на Блискиот Исток, но Техеран го објави своето затворање во саботата како одговор на израелските напади на Либан.
Оттогаш, Техеран и Вашингтон се согласија за механизми што треба да доведат до прекин на нападите врз Либан и обезбедување на Ормускиот теснец, низ кој во нормални услови поминува една петтина од светската нафта.
За ова, тие се согласија на „комуникациска линија“ со цел „да се избегнат инциденти и проблеми во комуникацијата“, соопштија катарските и пакистанските посредници во преговорите.
„И покрај неизвесноста во врска со преговорите меѓу САД и Иран, Ормускиот теснец остана оперативен во текот на викендот“, изјави Никос Потитакис, портпарол на Кплер, на платформата Икс денес, додавајќи дека многу бродови се префрлиле на рута одобрена од Техеран или продолжиле да пловат со исклучени транспондери.
