Министерството за информации во Киншаса соопшти дека 254 од 1.003 потврдени случаи во три провинции починале, додека 100 оздравеле. Се наведува дека 365 пациенти моментално се лекуваат во болници и одделенија за изолација.
Стапката на смртност моментално е околу 25 проценти. Бројките се базираат на случаите до саботата и беа објавени на социјалната мрежа Икс во неделата.
Откако беше прогласена епидемијата во мај, 19 лица во соседна Уганда исто така се заразиле со ебола, а две починале од исклучително заразната болест. Случаите биле поврзани со епидемијата во Конго.
Министерството соопшти дека 58 проценти од контактите на потврдените случаи моментално се следат. За да се спречи ширењето на болеста, Светската здравствена организација (СЗО) наведува дека е потребно да се идентификуваат и следат 90 проценти од сите луѓе кои биле во контакт со заразено лице.
Африканскиот центар за контрола и превенција на болести (Африка ЦДЦ) постојано изразува загриженост за големиот број непознати контакти кои не се следат.
Еболата е болест опасна по живот. Вирусот се пренесува преку физички контакт и контакт со телесни течности. Сегашната епидемија е особено тешко да се контролира, делумно затоа што сè уште нема вакцина или специфична терапија за типот Бундибугио на вирусот ебола.
