Сите 20 живи заложници се ослободени и префрлени со авион во Израел.
Речиси сите од нив беа меѓу 251 лице киднапирани за време на нападот на Хамас врз јужен Израел на 7 октомври 2023 година, во кој беа убиени околу 1.200 луѓе. Како одговор, Израел започна воена кампања во Газа, во која досега се убиени повеќе од 67.000 луѓе, според Министерството за здравство управувано од Хамас, јавува Би-би-си.
28 заложници се мртви, а нивните останки ќе бидат префрлени со авион во Израел во наредните денови.
Израел за возврат ќе ослободи 250 палестински затвореници и повеќе од 1.700 лица уапсени во Газа.
Големи собири и прослави се одржуваат на Плоштадот на заложниците во Тел Авив, каде што луѓето го чекаа враќањето на заложниците.
Американскиот претседател Доналд Трамп изјави дека „војната е завршена“. Трамп денеска се обраќа пред израелскиот парламент, а потоа ќе отпатува во египетското одморалиште Шарм ел Шеик, каде што ќе го предводи мировниот самит на кој ќе присуствуваат најмалку 20 светски лидери.
Се чека ослободувањето на палестинските затвореници: „Сакаме мир“
Додека автобусите за кои се верува дека превезуваат палестински затвореници го напуштаат израелскиот затвор Офер, стотици луѓе се собираат во Рамала, со нетрпение очекувајќи го ослободувањето на своите роднини во наредните минути.
Амро Абдула, 24, вели дека го чека својот братучед Рашид Омар, 48, кој беше уапсен во јули 2005 година и осуден на доживотен затвор од израелски суд по обвинение за убиство.
„Тој е подготвен да ја прифати слободата“, рече Амро, опкружен со десетици други семејства.
Многумина, вели тој, се возбудени и нервозни, но исто така среќни што гледаат надеж за крај на војната.
„Сакам мир“, рече Амро. „Сакам да живеам среќен, безбеден и мирен живот – без окупација и без ограничувања“.
