Министерката за заштита на животната средина, Ирена Велез, изјави дека претходните методи за контрола на нивната популација биле скапи и неуспешни, вклучувајќи кастрација на некои животни или нивно преместување во зоолошки градини. Велез изјави дека со оваа мерка би можеле да бидат опфатени до 80 нилски коњи. Таа не прецизираше кога ќе започне уништувањето, пренесува Си-ен-ен.
„Ако не го направиме тоа, нема да можеме да ја контролираме популацијата“, рече Велез. „Мора да преземеме акција за да ги зачуваме нашите екосистеми.“
Колумбија е единствената земја надвор од Африка со дива популација на нилски коњи. Тие потекнуваат од четири единки кои Ескобар ги донел во земјата во осумдесеттите години, кога градел приватна зоолошка градина на имотот Хасиенда Наполес, огромен ранч во долината на реката Магдалена со приватна писта што служела како негово селско засолниште.
Студија на Националниот универзитет на Колумбија процени дека околу 170 нилски коњи слободно се движеле низ земјата во 2022 година.
Неодамна, нилски коњи се забележани во области кои се наоѓаат повеќе од 100 километри северно од ранчот.
Еколошките власти во Колумбија наведуваат дека овие цицачи претставуваат закана за жителите кои ги среќаваат на фарми и во реки. Исто така, се натпреваруваат за храна и простор со локалните видови, како што се речните ламантини.
И покрај предизвиците, нилските коњи станаа и туристичка атракција, па жителите на селата околу имотот Хасиенда Наполес организираат тури за нивно набљудување и продаваат сувенири со мотиви од нилски коњи.
Тие се и една од главните атракции на ранчот Наполес, кој колумбиската влада го запленила при конфискацијата на имотот на Ескобар. Денес функционира како тематски парк со базени, водени тобогани и зоолошка градина во која има уште неколку африкански видови.
Активистите за заштита на животните во Колумбија долго време се спротивставуваат на предлозите за убивање на нилските коњи, тврдејќи дека заслужуваат да живеат. Велат дека решавањето на проблемот со насилство испраќа лоша порака во земја која поминала низ децении внатрешни конфликти.
Андреа Падиља, сенаторка и активистка за правата на животните која помогнала во изработката на закон против борбите со бикови во Колумбија, го опиша планот за отстрел како „сурова“ одлука и ги обвини властите дека се обидуваат да изберат полесен пат.
„Убиствата и масакрите никогаш нема да бидат прифатливи“, напиша Падиља на мрежата Икс. „Ова се здрави суштества кои се жртви на небрежноста“ на државните институции.
Во текот на изминатите 12 години, низ три претседателски администрации, Колумбија се обидувала да кастрира дел од нилските коњи со цел да ја намали нивната популација.
Сепак, овие иницијативи имале ограничен дострел поради високите трошоци за фаќање опасни животни и спроведување операции.
Бидејќи колумбиските нилски коњи потекнуваат од ограничен генетски фонд и би можеле да пренесуваат болести, нивното враќање во нивното природно живеалиште во Африка се смета за невозможно.
