Соговорниците разговараа за македонскиот евроинтегративен пат, при што беше констатирано дека Италија, како дел од неформалната група „Пријатели на Западен Балкан“, ја препознава важноста на проширувањето на ЕУ.
Сиљановска-Давкова изјави дека претседателот Матарела, како наш, но и голем пријател на Западниот Балкан, веќе разговарал со господинот Антонио Кошта, но и со госпоѓата Фон дер Лајен, за она што ни се случува и рекол дека „не смее Европската Унија да дозволи ние да бидеме жртва на идентитетски прашања, или на билатерализација врзана за идентитетските прашања“.
„Тој очекува, и јас очекувам да дојде до разговори со нашите соседи да видиме кое е можеби најдоброто решение“, рече претседателката и додаде дека ги реафирмирала заложбите за гаранции.
Таа истакна дека ако ова биде уште една од промените на којашто укажува ЕУ, не само што ние нема ништо да добиеме, туку нема да добие ништо ниту Балканот, бидејќи приказната за ветото и приказната за билатерализацијата на евроинтеграцијата ќе се повтори.
Македонската претседателка утрово имаше аудиенција кај Поглаварот на Римокатоличката црква, Папата Лео XIV со кого во подолг разговор е потврдено пријателството помеѓу државава и Ватикан.
Осврнувајќи се на посетата на Италија, Сиљановска-Давкова изјави дека и Папата и претседателот на Италија, биле и остануваат наши пријатели и дека навистина нема да ги заборават ниту принципите на ЕУ.
Претседателката, на средбите потсетила – ЕУ без принципи и вредности не може да биде филозофија, не може да биде престижна и инспиративна заедница, но исто така ја нагласила и потребата „да седнеме културно со соседите во случајов со Бугарија и да го решиме проблемот“, соопшти кабинетот на Сиљановска.
