Во јавниот повик ДИК објавува дека од заинтересираните кандидати ќе се селектираат 45 кандидати, а од кандидатите кои ќе ја поминат административната селекција и интервјуто се бара:
-Да ја посетуваат обуката за „Обука на обучувачи“ во траење од 5 дена, со цел да се зајакне знаењето и вештините на кандидатите за вршење обука/едукација на возрасни лица за изборниот процес и за одговорностите на изборните органи и сите вклучени страни и
-Да ја следат тековната програма за менторска поддршка од страна на вработените во Секторот за едукација на ДИК.
Оние што ќе ја поминат обуката за обучувачи и тестирањето ќе добијат сетификати.
Според огласот на ДИК, сертифицираните кандидати ќе имаат задача да спроведуваат обуки/сесии за едукација на општинските изборни комисии и на избирачките одбори според утврдените потреби и програмата, усвоена од ДИК, согласно Роковникот за спроведување на изборните дејствија за Локалните избори 2021 година.
„За да стане обучувач, кандидатот треба да е државјанин на Република Македонија (се докажува со копија од важечка лична карта и/или пасош); Да има завршено високо образование (се докажува со копија од Диплома и/или Уверение за завршено високо образование); Искуство во спроведување обуки во организација на граѓански организации и/или јавна администрација од областа на правниот и/или политичкиот систем ќе се смета за предност (се докажува со копија од сертификати, потврди и/или уверенија); Претходни искуства во изборниот процес ќе се смета за предност (се докажува со копија од сертификати, потврди и/или уверенија)“, пишува во огласот на ДИК.
Нивната задача ќе биде подготовка и спроведување на обуки за избирачки одбори за подготовка за Локалните избори 2021 година, спроведување на обуките за време на работни денови, денови на викенд и државни празници, заедничко работење со тим на обучувачи под водство на ментори од ДИК, патувања низ државата, согласно потребите, како и расположливост за спроведување на обуките според барањата и потребите на ДИК, непостојан/привремен ангажман.
