„Сметаме дека онлајн игрите на среќа се безбедно решение за играчите и одржливо решение за нашата индустрија која има силен социо-економски придонес во државната економија, особено во ситуација на актуелната пандемија со која се справуваат државата и светот. Бараме од Владата во најкус можен рок, со уредба или соодветно законско решение да им овозможи на македонските лиценцирани обложувалници да приредуваат онлајн игри на среќа, особено што сме една од ретките земји во која, во време на дигитализација, ваквата услуга не е достапна“, велат од АСОМ.
Како што соопштија од АСОМ, Уредбата што ја донесе Владата за времено овозможување онлајн игри на среќа преку македонските лиценцирани сајтови, се покажа како одлично решение за бизнисот и за државата. Уредбата придонесе спортските обложувалници да ги задржат сите вработени, но и да се овозможи прилив на средства во државниот буџет и кревката економија погодена од ковид кризата. Таа, додаваат, се покажа како одличен механизам за одржливост на оваа стопанска гранка која вработува околу 3.500 луѓе и придонесува во државниот буџет со над 250 милиони евра годишно.
Придобивка од воведувањето на онлајн игрите, додава АСОМ, е и превенција од нелегално спортско обложување на странски сајтови.
„Во периодот додека важеше Уредбата, според пресметките на АСОМ, од мај до декември 2020 година, од четирите проценти посебна давачка за онлајн се слеале околу 35 милиони денари, а од 15-те отсто данок на личен доход, околу 65 милиони денари, или вкупно 100 милиони денари за пет месеци, само од онлајн. Перспективно, само од оваа услуга, државата би инкасирала многу поголеми средства во буџетот. Непреточувањето на Уредбата во трајно законско решение придонесе играчите повторно да се вратат на странските сајтови, со што го избегнуваат данокот на личен доход кој изнесува 15 отсто на секоја остварена добивка. На овој начин парите за данокот, наместо во буџетот, се одлеваат надвор од државата. Според податоците со кои располагаме, станува збор за 40 до 50 милиони евра годишно, а ова се средства кои се од значаен интерес за домашната економија, задржување и отворање на нови работни места и инвестиции“, наведуваат од АСОМ.
АСОМ потсетува дека и пред истекот на Уредбата, во декември минатата година, бараше од Владата и институциите за да ја преточат во трајно законско решение, но, иако беше ветено, тоа не се случи.
„Владата ја донесе времената Уредба со која се овозможи онлајн спортско обложување преку сајтовите на македонските лиценцирани обложувалници на 24 април, 2020 година со важност до 22 декември. Уредбата поттикна инвестиции во софтер, хардвер и маркетинг за онлајн обложување кај домашните лиценцирани спортски обложувалници, средства кои, доколку повторно не се овозможи он-лајн услугата излегува дека се залудно вложени. Инаку, секоја година од индустријата на игри на среќа државниот и локалните буџети инкасираат повеќе од 250 милиони евра. Тука се вклучени директни и индиректни приходи, придонеси и даноци за плати, закуп на деловен простор. Воведувањето на онлајн игрите на среќа преку домашните лиценцирани обложувалници ќе значи дополнително зголемување на овие средства, односно уште поголем прилив во државниот буџет и повеќе средства кои понатаму се вложуваат во подобрување на квалитетот на животот на граѓаните. Ова е особено важно во време кога државата се соочува со здравствена криза, која ја разниша економијата тука и секаде во светот“, истакнуваат од Асоцијацијата.
