Како што се наведува во соопштението на Демократскиот сојуз, очигледно е дека зад овие активности стои политичката агенда на ДУИ, која, според партијата, по губењето на власта се обидува преку националистичка реторика, етнички тензии и вештачки кризи да предизвика дестабилизација на државата и да обезбеди политички поени.
„Демократски сојуз смета дека правото на употреба на албанскиот јазик мора да биде гарантирано и почитувано согласно Уставот, Охридскиот рамковен договор и законите, но истовремено мора да се зачува единствениот, функционален и ефикасен правосуден систем кој функционира на македонски јазик како службен јазик на државата. Недозволиво е правосудството да стане поле за политички и етнички конфронтации или за создавање паралелни системи кои би ја нарушиле правната сигурност и единството на институциите“, велат од Демократскиот сојуз.
Оттами ја повикуваат Владата да не подлегнува на притисоци, уцени и радикални барања, туку преку дијалог и стручна дебата да изнајде европско и одржливо решение кое ќе обезбеди целосно почитување на јазичните права на сите заедници, задолжително познавање на македонскиот јазик за носителите на правосудни функции, зачувување на единствениот правосуден систем и унитарниот карактер на државата.
