Референтните цени на нафтените деривати на светскиот пазар бележат намалување – кај бензините за 2,703%, кај дизелот за 3,251%, кај екстра лесното масло за 3,960% и кај мазутот намалувањето е за 4,476%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,7165%.
Од полноќ максималните цени на нафтените деривати ќе изнесуваат: моторен бензин еуросупер БС – 95 – 82 денари/литар, еуросупер БС – 98 – 84 денари/литар, еуродизел БС (Д-Е V) – 95,5 денари/литар, масло за горење екстра лесно 1 (ЕЛ-1) – 96,50 денари/литар и мазут М-1 НС – 49,227 денари/килограм.
Малопродажните цени на бензините еуросупер се намалуваат за 1,50 ден/лит, а на еуродизелот за 2,50 ден/лит.
Ова се максималните цени на нафтените деривати, а трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, соопшти РКЕ.
