Рубио денес ќе се сретне со сојузниците во Обединетите Арапски Емирати, а потоа ќе отпатува во Кувајт и Бахреин, каде што ќе се сретне со претставници на Советот за соработка во Заливот (ГЦЦ), група монархии во која се вклучени Саудиска Арабија, Катар и Оман.
На дневен ред се елементи од нацрт-договорот кои вклучуваат изостанок на ограничувања за балистичките ракети на Иран, предложен фонд за реконструкција од 300 милијарди долари и одредби што би можеле да го прошират регионалното влијание и контрола на Техеран врз клучните правци за испорака на нафта.
Сите шест земји од ГЦЦ се стратегиски сојузници на САД и обезбедија одредена логистичка поддршка на Вашингтон за време на американско-израелската агресија на Иран која започна пред четири месеци. Како последица на тоа, сите овие земји беа изложени на ирански ракетни напади.
Некои од тие земји се разочарани и изненадени од привремениот договор кој би можел да отвори врата за нормализирање на односите на САД со Иран, претежно шиитска земја што повеќето сунитски земји од ГЦЦ ја сметаат за свој главен противник.
Мислењата на тие земји се важни за американските политички актери. ОАЕ, Саудиска Арабија, Катар, Кувајт и Бахреин се домаќини на американски воени бази кои го формираат ‘рбетот на безбедносната архитектура на САД на Блискиот Исток. Доколку некоја од овие земји го преиспита својот безбедносен однос со САД, дури и на суптилен начин, тоа би можело да има значително влијание врз воената стратегија на САД во регионот.
Шефот на американската дипломатија на ова патување мора да ги увери регионалните сојузници, но мора да го стори тоа без да го критикува американско-иранскиот меморандум за разбирање. Претседателот Доналд Трамп, кој го потпиша договорот минатата недела, цврсто стои зад него и покрај критиките од некои републиканци во Конгресот кои ја обвинија администрацијата за капитулација пред Техеран.
Ендру Пик, поранешен заменик-помошник државен секретар за Ирак и Иран, кој служеше во Советот за национална безбедност на Трамп во текот на двата мандати, тврди дека Рубио би можел да ги смири нервозните сојузници потсетувајќи ги дека Трамп има историски строг став кон Исламската Република.
„Мислам дека можете само да ги потсетите дека претседателот спроведува исклучително строга политика кон Иран и ако овој меморандум не успее, тој нема да има никакви проблеми повторно да нападне“, кажа Пик, кој сега е во аналитичката група Атлантски совет.
