Лео, кој во последните месеци беше поотворен за политичките прашања, ги повика владите да ги зголемат средствата за борба против гладот и да не ја подложуваат помошта за храна на ограничувања врз основа на геополитички интереси.
„Конфликтите се „хранат“ полесно отколку што се хранат луѓето“, кажа првиот американски папа за време на посетата на седиштето во Рим на Светската програма за храна (ВФП), специјализирана хуманитарна агенција на Обединетите нации и најголемата светска организација за борба против гладот.
„Оваа реалност ги одразува не само оперативните недостатоци, туку и фундаменталната нерамнотежа во политичките и моралните приоритети“, порача тој.
ВФП е најголемиот снабдувач на прехранбена помош во светот. Нејзин најголем донатор се Соединетите Американски Држави, кои минатата недела објавија нов придонес од 800 милиони долари, по претходните намалувања на претседателот Доналд Трамп кои повеќе од половина го намалија планираното финансирање на САД.
Лео, кој го налути Трамп претходно оваа година критикувајќи ја војната на САД против Иран, денес не спомена конкретни лидери. Папата изрази жалење што хуманитарните кризи во светот се потиснати на „второ место меѓу меѓународните приоритети“.
Тој кажа дека земјите „сè повеќе ги насочуваат своите ресурси кон националната безбедност, економскиот раст и внатрешната стабилност, игнорирајќи дека овие прашања се тесно поврзани со меѓународната соработка“.
Денес Лео беше пречека во ВФП од Синди Мекејн, која претходно оваа година поднесе оставка од функцијата директор на агенцијата од здравствени причини.
ВФП, кој ја освои Нобеловата награда за мир во 2020 година, обезбеди 15,6 милијарди дневни оброци за 121 милион луѓе во 2025 година, финансирани со 6,5 милијарди долари приватни донации, според агенцијата.
Папата кажа дека пристапот до храна е „фундаментално човеково право засновано на достоинството на секој човек“. Тој додаде дека олеснувањето на гладот не само што им помага на оние на кои им е потребна помош, туку и се справува со основните причини за геополитичка нестабилност. „Безбедноста на храната е клучна компонента на глобалната и интегралната безбедност“, заклучи папата.
