Како што информира компанијата, донацијата опфаќа напредна заштитна опрема – одела, јакни, ракавици и чизми – наменета за пилотите кои управуваат со противпожарните авиони „Ер трактор“, со цел да се зголеми нивната безбедност и отпорност при интервенции во високоризични услови.
Паралелно, ОКТА ја реализира и кампањата „Пази што правиш! За пожар малку треба!“, во партнерство со Дирекцијата за заштита и спасување и ЈП „Национални шуми“, насочена кон поттикнување поодговорно однесување на граѓаните во природа и намалување на ризиците од пожари предизвикани од невнимание.
Главниот извршен директор на ОКТА, Димитриос Пасхос, истакнува дека компанијата останува посветена на безбедноста и заштитата на животната средина.
„Како компанија која континуирано вложува во безбедноста, заштитата на животната средина и поддршката на заедницата, веруваме дека превенцијата е најефикасниот начин за намалување на ризиците од пожари. Со оваа донација сакаме да дадеме конкретен придонес во зајакнувањето на капацитетите на институциите кои секојдневно се грижат за безбедноста на граѓаните и заштитата на природните богатства“, изјави Пасхос.
Од Дирекцијата за заштита и спасување посочуваат дека ваквата поддршка има директно влијание врз оперативната подготвеност на институцијата.
Според директорот Стојанче Ангелов, вложувањата во опрема и услови за работа придонесуваат за поефикасна реакција при вонредни состојби и заштита на луѓето и животната средина.
“Подеднакво важно е сознанието дека најдобриот начин за справување со шумските пожари е нивното спречување пред да се случат. Во таа насока ја поздравуваме и поддржуваме кампањата за подигнување на јавната свест, која придонесува кон градење култура на одговорност и превенција“, истакна Ангелов.
Од ОКТА информираат дека во изминатиот период компанијата реализирала повеќе иницијативи за зајакнување на националните капацитети за превенција и справување со пожари, вклучително и поддршка за системи за рано откривање и воспоставување центар за обука за противпожарна заштита.
Со овие активности, посочуваат од компанијата, се потврдува долгорочната заложба за создавање побезбедни, поотпорни и одржливи заедници, при што се нагласува дека заштитата на шумите и природните ресурси е заедничка одговорност на институциите, бизнис-заедницата и граѓаните.
