Четиридневната анкета открива длабока загриженост поради порастот на цените на бензинот, а исто така сугерира дека многу гласачи вината за своите проблеми им ја припишуваат на републиканските сојузници на Трамп, кои ќе го бранат своето мнозинство во Конгресот на парламентарните избори во ноември.
По повеќе од два месеци од почетокот на конфликтот, кој почна на 28 февруари со агресивна кампања на бомбардирање од САД и Израел, околу 66 проценти од испитаниците – вклучувајќи еден од тројца републиканци и речиси сите демократи – кажале дека Трамп „не ги објаснил јасно целите на воениот ангажман на САД против Иран“.
Војната, која стивна во последните недели откако двете страни изнесоа предлози за мир, ги зголеми цените на бензинот низ целата земја за околу 50 проценти, бидејќи Иран прекина една петтина од глобалната трговија со нафта. Техеран успеа да го држи тесниот Ормуски теснец затворен и покрај напорите на американските воени бродови да го отворат морскиот пат за глобалниот сообраќај на танкери за нафта.
Околу 63 проценти од Американците велат дека личната финансиска состојба на нивното домаќинство е погодена од неодамнешното зголемување на цените на бензинот, во споредба со 55 проценти во анкетата на Ројтерс/Ипсос од 17 до 19 март.
Околу 36 проценти од Американците го одобруваат работењето на Трамп, што е за два процентни поени повеќе во однос на анкетата на Ројтерс/Ипсос кон крајот на април, кога неговиот рејтинг на одобрување беше 34 проценти, најниско ниво во неговиот тековен мандат.
Анкетата на Ројтерс/Ипсос има маргина на грешка од три процентни поени во двата правци, врз основа на бројот на испитаниците.
Рејтингот на одобрување на Трамп останува под рејтингот на одобрување од 40 проценти кој го имаше непосредно пред почетокот на војната. Тој го почна својот мандат во јануари 2025 година со поддршка од 47 проценти, откако победи на претседателските избори во 2024 година ветувајќи дека ќе ги намали трошоците за Американците.
Три четвртини од јавноста – вклучувајќи и половината од републиканците – веруваат дека неговата администрација носи барем дел од одговорноста за наглиот пораст на цените на бензинот, според најновата анкета на Ројтерс и Ипсос. На прашањето која политичка партија е поодговорна, 65 проценти од испитаниците кажале дека републиканците се виновни, во споредба со 27 проценти кои ги обвиниле демократите.
Четворица од пет Американци кажале дека очекуваат цените на бензинот дополнително да растат.
Републиканците на конгресните избори го бранат тесното мнозинство во Претставничкиот дом и Сенатот на САД, а стратезите сметаат дека ќе имаат поголеми шанси да ја задржат контролата ако цените на бензинот паднат.
Но, бидејќи нема договор на повидок меѓу Вашингтон и Техеран, околу тројца од 10 Американци веќе очекуваат да ги намалат плановите за летен одмор ако цените на бензинот останат на сегашните нивоа, покажива анкетата. Многумина очекуваат да откажат патувања или да патуваат на пократки растојанија.
Последната анкета на Ројтерс/Ипсос била спроведена онлајн и вклучува одговори од 1.254 возрасни лица низ САД.
