„Историјата уште запиша дека пратениците од првиот мандат на плуралното Собрание од 1991 до 1994 година го дадоа својот исклучителен придонес во процесот на градење на македонската парламентарна демократија, и во креирањето и донесувањето на неопходните државотворни акти и документи со кои јасно се трасираше патот за изградба на самостојна и независна држава. Во мандатот на пратениците од првиот пратенички состав беше распишан референдумот за независност, беше усвоен првиот устав на независна Република Македонија и беа утврдени државната химна и знаме како темелни обележја на независната и суверена македонска држава“, вели премиерот.
Во трите декади што следеа по овој историски настан, Уставот на Република Северна Македонија, беше дополнет со амандмани уште во осум наврати за да бидат вградени сите неопхо дни и институционални и идентитетски атрибути на една самостојна и суверена држава според стандардите на домашното и меѓународното право, вели Заев и додава:
„Во годината кога одбележуваме 30 години независна држава, Република Северна Македонија како рамноправен партнер во најмоќниот безбедносен и политички сојуз – НАТО ги дели вредностите на Алијансата, а како кандидат за членство во ЕУ ги прифати и ги промовира европските вредности како резултат на слободно изразената волја на народот и низ политичките институции“објави на својот фејсбук – профил премиерот Зоран Заев.
