Како што напиша Мицкоски, Македонија за првпат од осамостојувањето е избрана за членка на Економскиот и социјалниот совет на Обединетите нации (ЕКОСОК), едно од водечките тела на светската организација. На гласањето одржано во седиштето на Обединетите нации во Њујорк, земјата добила поддршка од 174 држави членки и обезбедила место во Советот за мандатниот период 2027–2029 година.
Изборот во ЕКОСОК, Мицкоски го оцени како значајно дипломатско достигнување и потврда за зголеменото присуство на Македонија во меѓународните организации и процеси. Тој потсети дека Македонија во изминатиот период стана членка на Советот за човекови права на Обединетите нации, како и на Извршниот совет на Организацијата за забрана на хемиското оружје.
„Денешниот избор во ЕКОСОК е продолжение на тој позитивен тренд и доказ дека нашето присуство во меѓународните организации станува посилно и повидливо. Нашата цел е Македонија да биде држава која не стои на маргините, туку активно учествува, гради партнерства и придонесува во решавањето на прашањата што се важни за граѓаните и за меѓународната заедница. Овој успех е резултат на работа, доверба и одговорен пристап. Продолжуваме да ја зајакнуваме позицијата на Македонија, да создаваме нови можности и да покажеме дека со сериозна работа нашата држава може да биде почитуван и активен дел од глобалните процеси.
Економскиот и социјалниот совет (ЕКОСОК) на Обединетите нации е едно од шесте главни тела на организацијата и има клучна улога во координацијата на економските, социјалните и развојните политики на глобално ниво. ЕКОСОК е задолжено за координација на меѓународната соработка во областите на економскиот развој, социјалната политика, одржлив развој, борба против сиромаштијата, образование, здравство, вработување, родова еднаквост, човекови права, како и за климатските и развојните политики.
