„Овие институции одново ги убија нашите деца, одново ја убија надежта во нас дека оваа трагедија ако ништо друго ќе биде барем лекција за во иднина и никогаш вакво нешто нема да се повтори. Полицијата и Обвинителството ни должат одговор зошто никој не одговара за затворената врата во дискотеката Пулс! Кој ја даде и ја спроведе ваквата наредба и колку животи се загубени од ваквата постапка на полицијата“, праша една од мајките пред зградата на Полициската станица во Кочани.
Присутните побараа одговори од Министерството за внатрешни работи и за потеклото на пиротехниката, по чија употреба е предизвикан пожарот во дискотеката во која животите ги загубија 63 млади луѓе.
„Го прашуваме јавно Тошковски и Коцевски каде е одговорноста на Државниот пазарен инспекторат, кој врши инспекциски надзор над примената на законите во угостителството? Како е можно овој инспекторат да не увиди дека трговското друштво кое раководи со дискотеката таа кобна вечер работи спротивно на сите можни закони и процедури“, праша една од мајките чие дете животото го загуби во дискотеката Пулс.
Тие пред Општината, судот и полициската станица на институциите им порачаа и дека повеќе нема да молчат и нема да се откажат од борбата за правда.
Семејствата во своите говори пред институциите посочија дека нема да застанат додека неселективно сите виновници не одговараат.
„Сите институции, правни и физички лица, кои предизвикале дејствие со нивното несовесно и незаконско работење од 16 март, одејќи наназад до 2012 година кога дискотеката почнува да функционира, ќе одговараат! А пропусти што довеле до ова имало секоја година. Секоја година се пропуштале да се преземат одредени дејства и зато се случи ова масовно убиство“, истакна една од мајките на загинатите децата во Пулс.
Со семејствата на загинатите млади луѓе протестираше и семејството на Ѓоко Ѓеоргиевски, тапанарот на групата ДНК. Неговиот татко со болка и голема лутина им се обраќаше на надлежните институции бидејќи не е задоволен ниту од истрагата, ниту пак од институциите. Родителите на загинатите истакнаа дека веќе нема тишина и правда ќе бараат, но неселективна.
