Овие индекси се прават врз основа на паритетот на куповната моќ. Цените значително варираат меѓу земјите во Европа. Постојат значителни разлики дури и меѓу соседните земји како што се Австрија и Унгарија – или Германија и Полска, го пренесува Јуроњуз истражувањето на Евростат.
Според Евростат, со паритетот на куповната моќ може да се пресмета колку луѓето можат да купат со иста вредност на пари во различни земји. Резултатите се базираат на анкети за цени што опфаќаат повеќе од 2.000 потрошувачки стоки и услуги (храна, облека, пијалоци, хотели…), спроведени во 36 европски земји.
Според овие податоци Швајцарија е 3,9 пати поскапа од Турција или 184% поскапа од просекот на ЕУ. Турција и Македонија се на дното на оваа табела заедно со Бугарија, Романија, Босна и Херцеговина, Србија, Албанија, Црна Гора…
Турција е најевтина, со цени од 47% од просекот на ЕУ, што значи дека се 53% пониски од просекот на ЕУ.
Во ЕУ, Луксембург е најскапата земја, со цени 51% повисоки од просекот на ЕУ. Бугарија и Романија се најевтините членки, со 57% од просекот на ЕУ. Ова значи дека Луксембург е за околу 2,7 пати поскап од Бугарија и Романија, покажувајќи значителен, но помал јаз во споредба со разликата помеѓу Швајцарија и Турција.
Десет земји од ЕУ имаат цени над просекот на ЕУ, Данска, Ирска и Луксембург се најскапи.
Сите пет нордиски земји – Данска, Финска, Шведска, Норвешка и Исланд исто така постојано се рангираат близу врвот. А земјите од Централна и Источна Европа генерално имаат пониски нивоа на цени. Романија, Бугарија, Унгарија, Полска и балтичките држави – Латвија, Литванија и Естонија – се под просекот на ЕУ. Овие региони обично бележат пониски трошоци за работна сила.
Нивото на цените е исто така пониско во земјите кандидати за ЕУ – Турција, Македонија, Албанија, Србија и Босна и Херцеговина.
