Говорејќи на 44-та конференција на Организацијата за храна и земјоделство на Обединетите нации (ФАО), која во моментов се одржува во Рим, папата Лео истакна дека Католичката црква ги поддржува „сите иницијативи за ставање крај на скандалот со гладот во светот“.
„Денес, кога повеќето конфликти не ги водат редовни армии, туку групи вооружени цивили со малку ресурси, кои ја палат земјата и крадат добиток, блокирањето на помошта е тактика што сè повеќе ја користат оние кои сакаат да контролираат цела невооружена популација. Значи, во овој вид конфликт, првите воени цели стануваат водните мрежи и комуникациските патишта“, рече папата.
Тој истакна дека земјоделците не се во можност да ги продаваат своите производи во областите загрозени од насилство, а инфлацијата расте, што, како што рече, предизвикува огромен број луѓе да подлегнат на неволјата на гладот и да умрат, пренесува Ватикан њуз.
„Политичките кризи, вооружените конфликти и економските турбуленции играат централна улога во влошувањето на кризата со храна, попречувајќи ја хуманитарната помош и загрозувајќи го локалното земјоделско производство, со што се негира не само пристапот до храна, туку и правото на живот исполнет со достоинство и можности. Би била фатална грешка да не се залечат раните и пукнатините предизвикани од годините себичност и површност“, изјави папата.
Папата Лео истакна дека без мир и стабилност, нема да биде можно да се гарантираат отпорни земјоделски и прехранбени системи, ниту да се обезбеди здраво, достапно и одржливо снабдување со храна за сите, изразувајќи сомнеж дека целта „Нулта глад“ од Агендата 2030 година ќе биде постигната.
