Дембеле моментално заработува 18 милиони евра бруто годишно во Париз, или околу 10 милиони евра нето, но откако ја освои Златната топка, неговите апетити се зголемија и сега бара значително поголема сума за да ја продолжи соработката со „светците“. Според неофицијалните информации што ги објавија француските медиуми, тој побарал годишна плата од 60 милиони евра преку своите агенти, за што ПСЖ дури и не сака да преговара.
Во своето последно обраќање, првиот човек на парискиот клуб, Насер Ал-Келаифи потсети дека горната граница за платите на играчите е поставена во 2024 година, со цел финансиски да се стабилизира клубот. Францускиот шампион е цврст во својата одлука да се држи до неа, дури и ако тоа го чини заминување на неговата најголема ѕвезда.
„Интересите на тимот и клубот се на прво место. Никој не е над структурата што ја поставивме“ рече првиот човек на ПСЖ.
Доколку Дембеле не се откаже од своите барања, клубот ќе се сврти кон млади сили како што се Дезире Дуе, Бредли Баркола, Сени Мажулу и ќе им го посвети целото свое внимание. ПСЖ е загрижен и за историјата на повреди на Дембеле, која не му оди во прилог, како и за неконстантноста што ја имаше пред година и пол. Раководството на „светците“ го зема предвид и начинот на кој крилниот напаѓач се раздели со Борусија Дортмунд и Барселона, од каде што замина со многу бучава и скандал. Затоа, на „Паркот на принцовите“ се многу претпазливи во врска со новиот договор на Усман, бидејќи се свесни дека нешто слично може да им се случи и на нив.
Постојат шпекулации дека Дембеле би можел да заврши во Саудиска Арабија, бидејќи клубовите таму нема да имаат проблем да му платат 60 милиони евра по сезона.Останува да се види дали Французинот е подготвен да се пресели на Блискиот Исток во својот најдобар период од кариерата, бидејќи ПСЖ очигледно не е подготвен да ги исполни неговите високи барања. Оваа сезона, Дембеле постигна 14 гола и имаше осум асистенции во 31 натпревар во сите натпреварувања.
