Тој ја критикуваше изјавата на министерот за правда, посочувајќи дека наместо да собира информации за неговиот статус, треба да ги истражи, како што вели, „злоупотребите и незаконитостите“ во периодот на поранешната власт.
„Судот има обврска да ја утврди материјалната вистина и не може да се крие зад формалности“, наведува Груевски, додавајќи дека во неговите предмети биле користени „лажни сведочења, притисоци и политички влијанија“.
Тој тврди дека постоеле списоци за кривичен прогон, притисоци врз сведоци и адвокати, како и нарачки за пресуди од политички центри на моќ.
„Да ги прочита обвиненијата и пресудите и да види колку од нив се донесени под притисок“, порачува Груевски.
Во својата реакција тој ги оспорува и конкретните случаи за кои е осуден, тврдејќи дека нема лична корист и дека доказите биле погрешно толкувани или фабрикувани.
Груевски оценува дека странската јавност го перцепира како криминалец поради постоењето на пресуди, но дека не е запознаена со, како што наведува, „контекстот на политичката хајка“.
„Еден ден сето ова ќе стигне до ЕУ и ќе се види од вистински агол“, наведува тој.
Собирањето на потребната документација за екстрадиција на поранешниот премиер на Македонија, Никола Груевски, е во завршна фаза, соопшти Кривичниот суд во Скопје. Против него сè уште се водат постапки, иако дел од предметите веќе се правосилно завршени.
Од Министерството за правда побарале од судот да ги достави сите релевантни информации и измени што би можеле да влијаат врз постапката за екстрадиција, по што биле обезбедени потребните податоци.
Министерот за правда Игор Филков изјави дека државата го чека формирањето на новата влада во Унгарија, каде што Груевски доби политички азил по бегството. По тоа, се очекува официјално да биде испратено барање за негово враќање.
Новата унгарска влада би требало да биде формирана на 9 мај. Идниот премиер Петер Маѓар претходно најави построг пристап кон азилите и порача дека Унгарија нема да биде „прибежиште за криминалци“, најавувајќи можност за преиспитување на ваквите случаи.
Никола Груевски, доколку биде екстрадиран, треба да одлежи затворска казна од 10 и пол години за предметите „Насилство во Центар“ и „ТНТ“, додека за други случаи како „Титаник“ и „Талир 2“ постапките се водат во отсуство.
Во случај на негово враќање во земјата, тој би имал и право да бара повторување на судските процеси.
