Нашиот став е принципиелен, вели во изјавата за МКД.мк потпретседателот на ВМРО-ДПМНЕ Александар Николоски.
„Ние не учествуваме во таа работна група затоа што форматот на таа работна група не е соодветен. Се знае што е соодветен формат. Не може ВМРО-ДПМНЕ како најголема политичка партија да има еднаков глас колку и некоја невладина организација, се сета почит“, вели Николоски.
Ковачевски потврди дека вчера имал средби со претседателите на четири политички партии, кои се дел од владината коалиција, меѓу кои и со Али Ахмети лидерот на ДУИ, а темата им била датумот за изборите во 2024 година.
„Работната група треба во законот финално да ги усогласи препораките на ОБСЕ и ОДИХР, а треба да се разговара и за точниот датум за одржување на изборите во 2024 година. Изборите се распишуваат согласно закон и согласно Уставот и мандатот на избраните функционери. Тука пред сѐ мислам на претседателот на државата и на пратениците и нормално во рамките на законските рокови може да се разговара за финеси, во однос на тајмингот. Сѐ друго е одржување на вонинституционални средби“, рече Ковачевски.
Останува отворено прашањето дали воопшто власта и опозицијата во наредниот период воопшто ќе успеат да се координираат и да се договорат за датумите на претседателските и парламентарните избори за наредната година.
А.Д.
