Шпанската влада објави дека неидентификуван авион предизвикал тревога и накратко ги прекинал изјавите на литванскиот претседател Гитанас Науседа и шпанскиот премиер Педро Санчез, пренесува агенцијата АП.
Шпанските медиуми објавија дека авионот бил руски, но владиното соопштение не го прецизира тоа.
Неименуван претставник на НАТО за АП изјави дека шпанските авиони полетале „со цел да ги идентификуваат двата авиони што влегле во областа на Балтичко Море“.
Според него, тие авиони биле два руски борбени авиони Су-24, кои се движеле североисточно.
„Тие два руски авиони не доставија план за летот, немаа вклучен транспондер на летот, ниту разговараа со контролорите на авиосообраќајот“, рече официјалното лице.
Науседа и Санчез зборуваа на конференцијата додека два авиони на шпанското воено воздухопловство „јурофајтер тајфун“ се наоѓаа зад нив во базата во литванскиот град Сиаулаи, кога безбедносните служби ненадејно ги прекинаа лидерите додека екипажите потрчаа во борбените авиони, покажаа снимките во живо од конференцијата за медиумите.
Pedro Sánchez y Gitanas Nausèda, comparecían desde la base de Siauliai cuando se ha producido una alerta por la presencia de un avión no identificado. Todos los presentes han tenido que salir corriendo. https://t.co/icHe2Skye4 pic.twitter.com/1vkWiui7v2
— RTVE Noticias (@rtvenoticias) July 8, 2021
„Нашата прес-конференција беше прекината со вистински повик. Гледате, сè функционира одлично. Можам да потврдам дека борбените авиони полетаа за помалку од 15 минути по добивањето на алармот“, рече Науседа по инцидентот.
„Благодарение на Педро (Санчез), навистина видовме како работи нашата мисија за воздушен надзор“, додаде литванскиот претседател.
