Лидерот на ВМРО-ДПМНЕ повика на консензус, бидејќи, како што посочи, таква била праксата и порано, односно со консензус на сите политички фактори да се носи одлука околу датумот и времето на одржување на изборите.
„Уставот е јасен, дека мандатот на актуелниот пратенички состав важи до изборот на нов, но не повеќе од четири години. Имајќи предвид дека на 4 август 2020 година е формиран овој парламентарен состав и оттогаш почнува да важи мандатот на актуелниот пратенички состав, значи дека ние на 3 август мора да имаме нов пратенички состав“, рече Мицкоски.
Тој додаде дека не смее да се дозволи државата да влезе во уставна криза, иако според него веќе е влезена во таква криза, бидејќи, рече, Државната изборна комисија (ДИК) од седум има шест члена, односно согласно законот, треба да има четворица претставници на власта и тројца од опозицијата, но сега има четворица од власта и двајца на опозицијата.
„Ако во најскоро време не се номинира претставник на опозицијата, можно е овој процес од самиот почеток да биде предизвикан пред институциите во Македонија. Затоа велам дека веќе сме со едната нога во политичка и уставна криза. А од друга страна, немаме јасни датуми и рокови иако според Уставот и законите јасни се датумите и роковите“, изјави Мицкоски.
