„Тоа го правиме секојдневно. Беа двајца – еден брачен пар, а последна бројка е пет. Татко и две мали деца. Дел од кризниот штаб сега е фокусиран на Газа во обид да се извлечат тие пет луѓе. Она што е невозможно, ние да влијаеме на одлуката кога ќе се отвори границата. Таа одлука зависи од Египет и делумно од Израел. Во секојдневна комуникација сме со нашата вршителка на работи во Каиро Елма и со Мачеј во Тел Авив и со нашите државјани“, рече Садики.
Новиот амбасадор, кој одговараше на прашање на пратеничката Благица Ласовска од ВМРО-ДПМНЕ за тоа што се прави за извлекување на наши граѓани од Појасот Газа, меѓу другото информираше дека се издадени патни листови за децата кои немале пасош, а мајката на децата е палестински државјанин и за неа е издадена виза.
„Ќе зависи од египетските власти дали ќе дозволат таа да излезе од земјата. И ние ќе инсистираме. Амбасадата во Тел Авив не е акредитирана за палестинските територии. Неколку држави имаат формални релации со нив, но ние немаме и тоа е политичка одлука, но конзуларна заштита за Западниот Брег нудиме од Амбасадата во Тел Авив, а за Газа преку Амбасадата во Египет“, рече Садики.
Новиот амбасадор истакна дека Македонија имаме мала дијаспора во Израел и дека бројката на наши граѓани таму се движи меѓу 200 и 300.
Новиот амбасадор на Македонија во Тел Авив, Израел во излагањето пред пратениците, главно, се осврна на состојбата во Израел по нападот од страна на Хамас на 7 октомври. Се очекува да се види како ќе се одвива ситуацијата таму по најавената копнена офанзива на Израел.
„Северна Македонија ги следи позициите на Брисел и се залагаме за продолжување на преговорите сѐ до постигнување трајно и сеопфатно решение. Кризата во последните две недели покажа колку е важно сојузништвото на САД со Израел, пресудно за обезбедување поддршка за Израел“, рече Садики.
Кажа дека односите на Македонија и Израел се одлични, но имаме слаба секторска и економска соработка. Се предлага соработка во туризмот и економијата. Посетите на највисоко ниво ќе зависат од безбедносната состојба во земјата.
