Во услови на целосно откажани летови и блокиран авио транспорт со Израел, предизвикот за организирање на овој чартер лет е надминат преку соработка со „Ер Србија“ за транспорт на граѓаните кои побарале помош. Авионскиот превоз кој ќе биде организиран во текот на утрешниот ден, ќе биде бесплатен за граѓаните кои побарале помош, и ќе биде покриен од резервите на Буџетот“, се посочува во соопштението.
Во насока на ефикасна организација на авионскиот превоз, Министерството за надворешни работи, преку Дипломатско-конзуларното претставништво – Тел Авив обезбедил список и информации за македонските државјани кои се наоѓаат во Израел и кои побарале помош да се вратат во Македонија.
„Амбасадата во Тел Авив, од самиот почеток на кризата е во контакт со македонските државјани, а дел од граѓаните кои се затекнаа во Израел, веќе се вратени во земјата меѓу другото и со специјални летови на пријателските држави на Република Северна Македонија. Амбасадата и Министерството за надворешни работи остануваат отворени за сите прашања врзани со оваа проблематика“, се наведува во соопштението од Владата.
Премиерот Ковачевски претходно на фејсбук најави дека е обезбеден бесплатен лет од Тел Авив до Скопје за евакуација на македонските државјани кои во моментов се наоѓаат во Израел и кои побарале помош да се вратат.
„Тие веќе утре треба да се на безбедно и во своите домови“, напиша Ковачевски.
Во услови на откажани летови и целосно блокиран авио транспорт со Израел, навистина беше предизвик да се организира овој лет, посочува тој.
„На моја иницијатива и во разговор со премиерката на Србија, Ана Брнабиќ, нашите граѓани ќе ги вратиме дома со авион на ‘Ер Србија’. Благодарност до неа и до сите вклучени во процесот, добрососедството и овој пат се покажа на дело. Нашата отворена и директна комуникација за сите прашања е секогаш во насока на изнаоѓање решенија, што конкретно се потврди и овој пат. Посакувам мирен лет и што поскоро враќање дома#, пишува Ковачевски.
Министерот за надворешни работи Бујар Османи денеска на прес-конференција информира дека од Израел досега се вратени 60 македонски државјани, од вкупно 150 кои побарале помош. Најави дека преостанатите 90 ќе бидат евакуирани во текот на утрешниот ден. Тој денеска на прес-конференција рече дека ќе беше добро ако Македонија имаше владин авион.
„Ќе беше добро да имавме владин авион, но тоа е прашање на кое во иднина треба да се размислува“, рече Османи.
