„Целта е автопатот Кичево-Охрид да биде пуштен во употреба пред летната сезона, ако не во двата правци, тогаш барем едниот да биде во функција дотогаш. Зимските услови наредните месеци нема да бидат пречка да продолжи асфалтирањето на патот Кичево – Охрид и на делницата Страцин кон Длабочица, бидејќи компаниите кои работат на нив набавиле специјални адиви за асфалтирање на ниски температури. Градежната сезона на овие делници нема да биде во застој од ноември до март“, вели Трајановски.
Според првиот човек на ЈПДП овие адитиви се употребуваат во западноевропските земји, пред се во Германија, Норвешка, Шведска.
Активно се работи, како што кажа Трајановски, и на автопатиштата на кои е ангажиран американско-турскиот конзорциум „Бехтел и Енка“. Се работи на новата делница од Кичево кон Гостивар, односно до Букојчани, а направен е и проектот до селото Црвец. Истовремено, рече директорот на ЈПДП, се проектира и патот од Црвец до Букојчани, што треба да заврши во февруари следната година.
